ໃນປີຜ່ານມາ, ສະຖານະການເສດຖະກິດຂອງຈີນແລະຕ່າງປະເທດສັບສົນຫຼາຍ, ແຕ່ລວມຍອດຜະລິດຕະພັນພາຍໃນ ຫຼື GDP ຂອງຈີນໄດ້ເພີ່ມຂຶ້ນ 6,9% ເຊິ່ງເປັນການເພີ່ມຂຶ້ນເປັນຄັ້ງທຳອິດໃນຮອບ 7 ປີ; ຂະນະດຽວກັນ, ຍອດປະລິມານເສດຖະກິດ ໄດ້ບຸກທະລຸ 80000 ຕື້ຢວນເປັນຄັ້ງທຳອິດ ຄືບັນລຸ 82700 ຕື້ຢວນ ຫຼືປະມານ 12000 ຕື້ໂດລາສະຫະລັດ.
ຂໍ້ມູນທີ່ທາງການເຜີຍແຜ່ໃນຫວ່າງມໍ່ໆມານີ້ ສະແດງໃຫ້ເຫັນວ່າ, ຈັງຫວະການເຕີບໂຕຂອງ GDP 6,9% ນັ້ນ ແມ່ນການເພີ່ມຂຶ້ນເປັນຄັ້ງທຳອິດນັບແຕ່ປີ 2011 ເປັນຕົ້ນມາ, ຂະນະດຽວກັນ, ເສດຖະກິດຈີນກໍໄດ້ບັນລຸຄວາມໝັ້ນທ່ຽງໃນຫຼາຍດ້ານຄື: ດ້ານການປະກອບອາຊີບ, ດ້ານລາຄາສິນຄ້າ ແລະດ້ານລາຍຮັບລາຍຈ່າຍສາກົນ. ຂໍ້ມູນຍັງສະແດງໃຫ້ເຫັນວ່າ, ການພົວພັນລະຫວ່າງການສະໜອງກັບຄວາມຕ້ອງການໃນຂົງເຂດອຸດສາຫະກຳຂອງຈີນ ໄດ້ປັບປຸງໃຫ້ດີຂຶ້ນຢ່າງບໍ່ຢຸດຢັ້ງ, ຕົວເລກດັດຊະນີ PPI ໄດ້ປ່ຽນແປງສະພາບການຫຼຸດລົງໃນ 5 ປີຕິດຕໍ່ກັນນັບແຕ່ປີ 2012 ເປັນຕົ້ນມາ, ອັດຕາການນຳໃຊ້ຄວາມສາມາດການຜະລິດດ້ານອຸດສາຫະກຳທົ່ວປະເທດ ໄດ້ສ້າງສະຖິຕິໃໝ່ໃນ 5 ປີມານີ້. ພ້ອມກັນນັ້ນ, ມູນຄ່າຂາເຂົ້າຂາອອກໃນປີ 2017 ຜ່ານມາ ກໍໄດ້ເພີ່ມຂຶ້ນ 14,2% ເມື່ອທຽບໃສ່ປີ 2016 ເຊິ່ງເປັນການປ່ຽນແປງສະພາບການທີ່ຫຼຸດລົງໃນ 2 ປີຕິດຕໍ່ກັນ.
ໃນຂະນະທີ່ເສດຖະກິດໂດຍລວມໄດ້ຮັບການພັດທະນາເປັນຢ່າງດີ, ປີຜ່ານມາ, ການປະຕິຮູບອົງປະກອບດ້ານການສະໜອງຂອງຈີນ ກໍໄດ້ຮັບຄວາມຄືບໜ້າທີ່ສຳຄັນ. ໜ້າທີ່ຫຼຸດຜ່ອນຄວາມສາມາດການຜະລິດທີ່ເຫຼືອເກີນໃນດ້ານເຫຼັກກ້າ, ຖ່ານຫີນ ແລະການຜະລິດໄຟຟ້າດ້ວຍຖ່ານຫີນທີ່ຖືກກຳນົດໄວ້ໃນບົດລາຍງານວຽກງານລັດຖະບານໃນຕົ້ນປີນັ້ນ ໄດ້ສຳເລັດຢ່າງສະດວກ. ອັດຕາໜີ້ສິນຕໍ່ຊັບສິນຂອງວິສາຫະກິດທີ່ມີຂະໜາດໃຫຍ່ໃນທ້າຍເດືອນພະຈິກປີຜ່ານມາ ໄດ້ຫຼຸດລົງ 0,5%..
ສິ່ງທີ່ຄວນກ່າວເຖິງນັ້ນແມ່ນ, ມູນຄ່າເພີ່ມຂອງອຸດສາຫະກຳຈະເລີນໃໝ່ທາງຍຸດທະສາດ, ອຸດສາຫະກຳເຕັກນິກສູງ ແລະອຸດສາຫະກຳການຜະລິດອຸປະກອນຂອງຈີນ ໄດ້ເພີ່ມຂຶ້ນຫຼາຍກວ່າ 10%, ການຜະລິດຫຸ່ນຍົນ ແລະ ລົດຍົນທີ່ໃຊ້ພະລັງງານໃໝ່ ໄດ້ເພີ່ມຂຶ້ນຫຼາຍກວ່າ 50%.
ກອງປະຊຸມວຽກງານເສດຖະກິດສູນກາງ ໄດ້ລະບຸໄວ້ຢ່າງຈະແຈ້ງ ຄື: ເສດຖະກິດຈີນ ຈາກໄລຍະທີ່ພັດທະນາດ້ວຍຄວາມໄວສູງຫັນປ່ຽນໄປສູ່ໄລຍະການພັດທະນາດ້ວຍຄຸນນະພາບສູງ. ການທີ່ຊຸກຍູ້ການພັດທະນາເສດຖະກິດດ້ວຍຄຸນນະພາບສູງນັ້ນ ຈະກາຍເປັນຄວາມຮຽກຮ້ອງຕ້ອງການພື້ນຖານໃນການຈັດວາງນະໂຍບາຍເສດຖະກິດ ແລະ ປະຕິບັດການດັດສົມຄວບຄຸມມະຫາພາກຂອງຈີນ.
 |
