ວັນທີ 22 ມັງກອນນີ້, ທ່ານມູນແຈອິນ ປະທານາທິບໍດີ ສ ເກົາຫຼີກ່າວວ່າ: ການເຈລະຈາລະຫວ່າງ ສ ເກົາຫຼີ ແລະ ສປປ ເກົາຫຼີໃນໂອກາດງານກິລາໂອແລມປິກລະດູໜາວພຽງຊາງບໍ່ແມ່ນເລື່ອງງ່າຍປານໃດ, ສະນັ້ນ, ຮຽກຮ້ອງໃຫ້ປະຊາຊົນທົ່ວປະເທດເຕົ້າໂຮມຄວາມສາມັກຄີ ແລະຮັກສາໂອກາດນີ້ໄວ້ໃຫ້ດີ. ສ ເກົາຫຼີ ແລະ ສປປ ເກົາຫຼີຄວນກຳແໜ້ນໂອກາດອັນປະເສີດດັ່ງກ່າວ, ສຸມສະຕິປັນຍາ ແລະພະຍາຍາມຮ່ວມກັນຮັກສາການເຈລະຈາ ເພື່ອແກ້ໄຂບັນຫານິວເຄຼຍ ສປປ ເກົາຫຼີໂດຍສັນຕິ ແລະສ້າງສັນຕິພາບໃຫ້ແຫຼມເກົາຫຼີ.
ທ່ານໄດ້ຮຽກຮ້ອງໃຫ້ວົງການຕ່າງໆຂອງປະເທດຕົນເຕົ້າໂຮມຄວາມສາມັກຄີເພື່ອຊຸກຍູ້ເຮັດໃຫ້ງານກິລາໂອແລມປິກລະດູໜາວພຽງຊາງໄດ້ຮັບຜົນສຳເລັດຢ່າງຈົບງາມ ແລະຂະນະດຽວກັນກໍຫວັງວ່າ ສປປ ເກົາຫຼີຈະຮ່ວມກັບ ສ ເກົາຫຼີພະຍາຍາມເພື່ອຜ່ານຜ່າຄວາມຫຍຸ້ງຍາກຕ່າງໆ.
ທ່ານຍັງຊີ້ໃຫ້ເຫັນວ່າ: ສປປ ເກົາຫຼີເຂົ້າຮ່ວມງານໂອແລມປິກພຽງຊາງຄັ້ງນີ້ມີຄວາມສຳຄັນຍິ່ງໃຫຍ່ ແລະທັງເປັນການເສີມຂະຫຍາຍບົດບາດໃຫ້ແກ່ງານໂອແລມປິກນີ້ໃຫ້ໄດ້ຮັບຜົນສຳເລັດຢ່າງຈົບງາມ ແລະການພັດທະນາເສດຖະກິດຂອງປະເທດຕົນ. ສະນັ້ນ, ມີຄວາມຈຳເປັນຕ້ອງລົງເລິກການເຈລະຈາ ເພື່ອຊຸກຍູ້ການແກ້ໄຂບັນຫານິວເຄຼຍ ສປປ ເກົາຫຼີໂດຍສັນຕິ ແລະບັນລຸສັນຕິພາບ ແລະຄວາມຈະເລີນຮຸ່ງເຮືອງຂອງແຫຼມເກົາຫຼີ.
 |
