ຜົນການຄົ້ນຄວ້າໃໝ່ຂອງນັກວິທະຍາສາດຊູແອັດສະແດງໃຫ້ເຫັນວ່າ: ຄົນຜູ້ໜຶ່ງທີ່ນັ່ງລ້າໆເປັນເວລາເຄິ່ງຊົ່ວໂມງໃນທຸກມື້ນັ້ນ ຫາກຫັນໄປອອກກຳລັງກາຍແບບເບົາ ກໍຈະສາມາດຫຼຸດຄວາມສ່ຽງໃນການຕາຍຍ້ອນເປັນພະຍາດຫຼອດເລືອດຫົວໃຈ.
ນັກຄົ້ນຄວ້າຈາກສະຖາບັນຕ່າງໆຂອງຊູແອັດເຊັ່ນສະຖາບັນຄາໂຣລິນສຄາ ໄດ້ຕິດຕາມຄົ້ນຄວ້າສະພາບການອອກກຳລັງກາຍຂອງ 1200 ຄົນແລະຄົ້ນຄວ້າອັດຕາການຕາຍຂອງຄົນເຫຼົ່ານີ້ຫຼັງ 15 ປີ ເຊິ່ງຜົນການຄົ້ນຄວ້າສະແດງໃຫ້ເຫັນວ່າ: ແຕ່ລະມື້, ປ່ຽນຈາກການນັ່ງລ້າໆເປັນເວລາເຄິ່ງຊົ່ວໂມງ ມາເປັນການອອກກຳລັງກາຍປະຈຳວັນເຊັ່ນການຢືນ,ຍ່າງເລາະຫຼືເຮັດວຽກບ້ານການເຮືອນເຫຼົ່ານີ້ເປັນຕົ້ນ ກໍຈະສາມາດຫຼຸດຄວາມສ່ຽງໃນການຕາຍຍ້ອນເປັນພະຍາດຫຼອດເລືອດຫົວໃຈເຖິງ 24%.
ຜົນການຄົ້ນຄວ້າຍັງສະແດງໃຫ້ເຫັນວ່າ: ການທີ່ປ່ຽນຈາກການນັ່ງລ້າໆຫັນໄປອອກກຳລັງກາຍໃນລະດັບປານກາງເຊັ່ນຍ່າງໄວຫຼືລະດັບຮຸນແຮງນັ້ນ ຈະໄດ້ຮັບຜົນຫຼາຍກວ່າເກົ່າໃນການຫຼຸດຄວາມສ່ຽງໃນການຕາຍຍ້ອນເປັນພະຍາດຫຼອດເລືອດຫົວໃຈ. ສ່ວນການອອກກຳລັງກາຍໃນລະດັບປານກາງຫາລະດັບຮຸນແຮງ 10 ນາທີຕໍ່ມື້ກໍຈະສາມາດຫຼຸດຄວາມສ່ຽງໄດ້ 38%, ແລະອອກກຳລັງກາຍແບບນີ້ 30 ນາທີຕໍ່ມື້ຈະສາມາດຫຼຸດຄວາມສ່ຽງໄດ້ 77%.
ຫົວໜ້າທີມງານຄົ້ນຄວ້າດັ່ງກ່າວຢືນຢັນວ່າ: ຜົນການຄົ້ນຄວ້າດັ່ງກ່າວເປັນປະໂຫຍດຕໍ່ຊາວໜຸ່ມແລະຜູ້ສູງອາຍຸທີ່ນັ່ງລ້າໆ, ສະນັ້ນຈິ່ງແນະນຳໃຫ້ເຂົາເຈົ້າຄວນເພີ່ມເວລາອອກກຳລັງກາຍປົກກະຕິ.