ວັນທີ 29 ມັງກອນນີ້, ຢູ່ນະຄອນຫຼວງຈາກາຕາຂອງອິນໂດເນເຊຍ, ທ່ານລິມຈົກໂຮຍ ເລຂາທິການໃຫຍ່ອາຊຽນກ່າວວ່າ, ອາຊຽນເອົາໃຈໃສ່ສູງຕໍ່ຈີນທີ່ໄດ້ເສີມຂະຫຍາຍບົດບາດສຳຄັນໃນການປົກປັກຮັກສາສັນຕິພາບ, ສະຖຽນລະພາບ, ຊຸກຍູ້ການພັດທະນາ ແລະ ຄວາມຈະເລີນຮຸ່ງເຮືອງຢູ່ພາກພື້ນຕົນ.
ທ່ານລິມຈົກໂຮຍ ກ່າວໃນເວລາຮັບເອົາສານຕາຕັ້ງຈາກທ່ານຮວງຊີລຽນ ເອກອັກຄະລັດຖະທູດຈີນປະຈຳອາຊຽນຄົນໃໝ່ວ່າ, ຈີນແມ່ນໜຶ່ງໃນຄູ່ເຈລະຈາທີ່ສຳຄັນທີ່ສຸດຂອງອາຊຽນ ແລະ ກໍແມ່ນຄູ່ການຄ້າໃຫຍ່ທີ່ສຸດຂອງອາຊຽນ. ອາຊຽນຍິນດີພະຍາຍາມຮ່ວມກັບຈີນ, ເພີ່ມຄວາມໄວ້ເນື້ອເຊື່ອໃຈທາງການເມືອງຢ່າງບໍ່ຢຸດຢັ້ງ, ເພີ່ມທະວີການເຊື່ອມຕໍ່ດ້ານຍຸດທະສາດການພັດທະນາ, ລົງເລິກການຮ່ວມມືໃນດ້ານເສດຖະກິດການຄ້າ ແລະ ຂົງເຂດອື່ນໆ, ຊຸກຍູ້ການພົວພັນຄູ່ຍຸດທະສາດອາຊຽນ-ຈີນຂະຫຍາຍຕົວຢ່າງປອດໃສ, ປະກອບສ່ວນຫຼາຍກວ່າເກົ່າ ເພື່ອປົກປັກຮັກສາສັນຕິພາບ, ສະຖຽນລະພາບ ແລະ ຊຸກຍູ້ຄວາມຈະເລີນຮຸ່ງເຮືອງຂອງພາກພື້ນນີ້.
ທ່ານຮວງຊີລຽນກ່າວວ່າ, ການພົວພັນຈີນ-ອາຊຽນມີທ່ວງທ່າຂະຫຍາຍຕົວເປັນຢ່າງດີ ແລະ ມີອະນາຄົດກວ້າງຂວາງ. ຈີນຈະສືບຕໍ່ສະໜັບສະໜູນການສ້າງສາປະຊາຄົມອາຊຽນ, ສະໜັບສະໜູນຖານະໃຈກາງຂອງອາຊຽນໃນການຮ່ວມມືພາກພື້ນ ແລະ ສະໜັບສະໜູນອາຊຽນເສີມຂະຫຍາຍບົດບາດຫຼາຍກວ່າເກົ່າໃນວຽກງານພາກພື້ນ ກໍຄື ວຽກງານສາກົນ.
 |
