ກະຊວງທ່ອງທ່ຽວຟິລິບປິນເປີດເຜີຍຂໍ້ມູນໃນວັນທີ 29 ມັງກອນນີ້ວ່າ, ປີ 2017 ຜ່ານມາ, ຈີນໄດ້ກາຍເປັນແຫຼ່ງນັກທ່ອງທ່ຽວໃຫຍ່ອັນດັບ 2 ຂອງປະເທດຕົນ ໂດຍມີ 9 ແສນ 6 ໝື່ນ 8 ພັນເທື່ອຄົນມາທ່ຽວ.
ກະຊວງທ່ອງທ່ຽວຟິລິບປິນ ໄດ້ອອກຖະແຫຼງການສະບັບໜຶ່ງໃນມື້ດຽວກັນວ່າ, ໃນປີ 2017 ຜ່ານມາ, ໄດ້ມີນັກທ່ອງທ່ຽວຈີນປະມານ 9 ແສນ 6 ໝື່ນ 8 ພັນເທື່ອຄົນມາທ່ຽວປະເທດຕົນ ເພີ່ມຂຶ້ນ 43,3% ເມື່ອທຽບໃສ່ປີ 2016 ແລະໄດ້ເຮັດໃຫ້ຈີນລື່ນກາຍອາເມລິກາ ແລ້ວກາຍເປັນແຫຼ່ງນັກທ່ອງທ່ຽວໃຫຍ່ອັນດັບ 2 ຂອງປະເທດຕົນ. ຄຽງຄູ່ກັບບໍລິສັດການບິນສອງປະເທດຟິລິບປິນແລະຈີນເປີດຖ້ຽວບິນໂດຍກົງຫຼາຍກວ່າເກົ່າໃນປີນີ້ ແລະຄາດວ່າ ຈະມີນັກທ່ອງທ່ຽວຈີນໄປທ່ຽວຟິລິບປິນຫຼາຍຂຶ້ນກວ່າເກົ່າ.
ເພື່ອດຶງດູດນັກທ່ອງທ່ຽວຈີນ, ລັດຖະບານຟິລິບປິນໄດ້ວາງນະໂຍບາຍກ່ຽວກັບວີຊາກັບດ່ານຕໍ່ຄະນະທ່ອງທ່ຽວ, ນັກທຸລະກິດ ແລະຜູ້ເຂົ້າຮ່ວມກອງປະຊຸມຂອງຈີນໃນເດືອນສິງຫາປີ 2017 ຜ່ານມາ.
 |
