ຕາມຂ່າວ CRI: ສະຖານທູດຈີນປະຈຳລາວໄດ້ຈັດງານລ້ຽງຮັບຮອງປີໃໝ່ຈີນຢູ່ສະຖານທູດຈີນປະຈຳລາວໃນວັນທີ 31 ມັງກອນຜ່ານມາ, ໂດຍທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດແລະສິ່ງແວດລ້ອມ, ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳແລະການຄ້າທັງເປັນປະທານຄະນະກຳມາທີການຮ່ວມມືລາວ-ຈີນ, ບັນດາຮອງລັດຖະມົນຕີພ້ອມດ້ວຍຜູ້ຕາງໜ້າບໍລິສັດຈີນປະຈຳລາວ, ນັກສຶກສາ, ຊາວຈີນຢູ່ລາວແລະຊາວລາວເຊື້ອສາຍຈີນແລະພາກສ່ວນທີ່ກ່ຽວຂ້ອງ 300 ກວ່າຄົນເຂົ້າຮ່ວມ. ໂອກາດດັ່ງກ່າວ, ທ່ານ ຫວາງເຫວີນທຽນ ເອກອັກຄະລັດຖະທູດ ສປ ຈີນປະຈໍາ ສປປ ລາວ ໄດ້ສະແດງຄວາມຢື້ຢາມຖາມຂ່າວແລະອວຍພອນອັນປະເສີດບັນດາແຂກຮັບເຊີນໃນໂອກາດປີໃໝ່ຈີນ ພ້ອມທັງສະແດງຄວາມຂອບໃຈຕໍ່ບຸກຄົນໃນວົງການຕ່າງໆທີ່ປະກອບສ່ວນເຂົ້າໃນການຊຸກຍູ້ສົ່ງເສີມການຮ່ວມມືມິດຕະພາບລະຫວ່າງສອງປະເທດຈີນ-ລາວ. ທ່ານ ຫວາງເຫວີນທຽນ ກ່າວວ່າ, ປີ 2017 ເປັນປີທີ່ມີຄວາມໝາຍຂີດແບ່ງປະຫວັດສາດຂອງຈີນໂດຍ ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ຈັດຂຶ້ນດ້ວຍຜົນສຳເລັດ, ການນຳສູງສຸດຂອງສອງປະເທດຈີນ-ລາວໄດ້ຢ້ຽມຢາມເຊິ່ງກັນລະກັນໂດຍສອງຝ່າຍເປັນເອກະພາບກັນສ້າງປະຊາຄົມຮ່ວມຊາຕາກຳທີ່ມີຄວາມໝາຍຍຸດທະສາດທີ່ຕັດແຍກຈາກກັນບໍ່ໄດ້, ສາຍພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດພວມຢູ່ໃນໄລຍະທີ່ດີທີ່ສຸດໃນປະຫວັດສາດ. ຫວັງວ່າຊາວຈີນຢູ່ລາວແລະຊາວລາວເຊື້ອສາຍຈີນ, ນັກສຶກສາ, ບໍລິສັດຈີນປະຈຳລາວທັງຫຼາຍຈະສົ່ງເສີມມູນເຊື້ອອັນດີງາມຂອງປະຊາຊາດຈີນ, ຊ່ວຍເຫຼືອສາມັກຄີນຳກັນ ເພື່ອສືບຕໍ່ປະກອບສ່ວນເຂົ້າໃນການສ້າງປະຊາຄົມຮ່ວມຊາຕາກຳຈີນ-ລາວກໍຄືການພັດທະນາເສດຖະກິດ-ສັງຄົມຂອງລາວ. ໃນໂອກາດດັ່ງກ່າວ, ຜູ້ຕາງໜ້ານັກການທູດຢູ່ສະຖານທູດຈີນປະຈຳລາວ, ຊາວຈີນຢູ່ລາວແລະຊາວລາວເຊື້ອສາຍຈີນແລະບໍລິສັດຈີນປະຈຳລາວແລະອົງການ ຈັດຕັ້ງອື່ນໆໄດ້ສະແດງສິລະປະວັນນະຄະດີໂດຍການສະແດງບົດຟ້ອນຈີນແລະອື່ນໆ ທີ່ເຕັ້ມໄປດ້ວຍບັນຍາກາດມ່ວນຊື່ນຄຶກຄື້ນບຸນກຸດຈີນປະຈຳປີ 2018.
