ຂ່າວສານຊິນຮວາ ໄດ້ຮັບການມອບສິດໃຫ້ເປີດເຜີຍເອກະສານເລກໜຶ່ງຂອງສູນກາງຈີນກ່ຽວກັບວຽກງານພັດທະນາຊົນນະບົດ, ກະສິກຳ ແລະ ຊາວກະສິກອນ ເຊິ່ງເປັນສະບັບທີ 20 ນັບແຕ່ຈີນດຳເນີນການປະຕິຮູບແລະໄຂປະຕູສູ່ພາຍນອກເປັນຕົ້ນມາ ແລະເປັນສະບັບທີ 15 ນັບແຕ່ສະຕະວັດໃໝ່ເປັນຕົ້ນມາ ໃນວັນທີ 4 ກຸມພານີ້ ເຊິ່ງເອກະສານດັ່ງກ່າວພາດຫົວວ່າ "ຄຳເຫັນຂອງສູນກາງພັກກອມມູນິດຈີນ ແລະ ລັດຖະບານຈີນກ່ຽວກັບການຈັດຕັ້ງປະຕິບັດຍຸດທະສາດພັດທະນາຊົນນະບົດໃຫ້ຈະເລີນ" ໂດຍໄດ້ຈັດວາງປະຕິບັດຍຸດທະສາດດັ່ງກ່າວຢ່າງຮອບດ້ານ.
ເອກະສານດັ່ງກ່າວໄດ້ມີການຈັດວາງຈາກດ້ານຕ່າງໆຢ່າງຮອບດ້ານ ເຊັ່ນ ຍົກສູງຄຸນນະພາບການພັດທະນາກະສິກຳ, ຊຸກຍູ້ການພັດທະນາຊົນນະບົດແບບສີຂຽວ, ພັດທະນາວັດທະນະທຳຊົນນະບົດໃຫ້ຈະເລີນສີວິໄລ, ສ້າງລະບົບຄຸ້ມຄອງຊົນນະບົດໃໝ່, ຍົກລະດັບການຮັບປະກັນດ້ານຊີວິດການເປັນຢູ່ຂອງປະຊາຊົນໃນຊົນນະບົດໃຫ້ສູງຂຶ້ນ, ເອົາຊະນະໃນບັ້ນລົບລ້າງຄວາມທຸກຍາກເຊິ່ງພວມຢູ່ໃນຂັ້ນຕອນປະສົບຄວາມຫຍຸ້ງຍາກທີ່ສຸດ, ເສີມສ້າງລະບຽບການດ້ານການພັດທະນາຊົນນະບົດໃຫ້ຈະເລີນ, ສົ່ງເສີມການພັດທະນາບຸກຄະລາກອນເພື່ອສະໜັບສະໜູນການພັດທະນາຊົນນະບົດໃຫ້ຈະເລີນ, ເພີ່ມທະວີແລະຮັບປະກັນການລົງທຶນຕໍ່ການພັດທະນາຊົນນະບົດໃຫ້ຈະເລີນ, ຍຶດໝັ້ນແລະປັບປຸງການນຳພາຂອງພັກຕໍ່ ວຽກງານພັດທະນາຊົນນະບົດ, ກະສິກຳ ແລະ ຊາວກະສິກອນ ແລະອື່ນໆ.
ເອກະສານໄດ້ກຳນົດເປົ້າໝາຍແລະໜ້າທີ່ຂອງການຈັດຕັ້ງປະຕິບັດຍຸດທະສາດພັດທະນາຊົນນະບົດໃຫ້ຈະເລີນ ຄື ເມື່ອຮອດປີ 2020, ການພັດທະນາຊົນນະບົດຈະມີຄວາມຄືບໜ້າທີ່ສຳຄັນ, ລະບຽບ ແລະ ລະບົບນະໂຍບາຍໄດ້ສ້າງຂຶ້ນໂດຍພື້ນຖານ; ເມື່ອຮອດປີ 2035, ການພັດທະນາຊົນນະບົດຈະມີຄວາມຄືບໜ້າແບບຕັດສິນຊີ້ຂາດ, ການຫັນກະສິກຳແລະຊົນນະບົດເປັນທັນສະໄໝຈະບັນລຸຄວາມເປັນຈິງໂດຍພື້ນຖານ ແລະ ເມື່ອຮອດປີ 2050, ຊົນນະບົດຈະພັດທະນາຈະເລີນຢ່າງຮອບດ້ານ ແລະບັນລຸເປົ້າໝາຍຮອບດ້ານ ຄື ກະສິກຳເຂັ້ມແຂງ, ຊົນນະບົດສວຍງາມ ແລະ ຊາວກະສິກອນຮັ່ງມີ.
