ເນື່ອງໃນໂອກາດບຸນກຸດຈີນ ເຊິ່ງເປັນບຸນປີໃໝ່ຕາມປະເພນີຂອງຈີນທີ່ຈະມາເຖິງ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະໂອ້ລົມກັບຊ່ຽວຊານຕ່າງປະເທດຈຳນວນໜຶ່ງທີ່ເຮັດວຽກຢູ່ຈີນນັ້ນຢ່າງສະໜິດສະໜົມຢູ່ຫໍສະພາປະຊາຊົນແຫ່ງຊາດຈີນນະຄອນຫຼວງປັກກິ່ງໃນວັນທີ 5 ກຸມພານີ້.
ທ່ານຫຼີເຄີ້ສຽງຕາງໜ້າໃຫ້ລັດຖະບານຈີນຝາກຄວາມຢື້ຢາມຖາມຂ່າວທີ່ຈິງໃຈແລະອວຍພອນໄຊອັນປະເສີດໄປຍັງຊ່ຽວຊານຕ່າງປະເທດທຸກທ່ານທີ່ເຮັດວຽກຢູ່ຈີນ.
ທ່ານຫຼີເຄີ້ສຽງ ເນັ້ນວ່າ: ໄປຄຽງຄູ່ກັບຈີນເປີດປະຕູສູ່ພາຍນອກນັບມື້ກວ້າງອອກ, ຈີນຈະປະຕິບັດນະໂຍບາຍດຶງດູດຜູ້ມີຄວາມຮູ້ຄວາມສາມາດຈາກຕ່າງປະເທດຢ່າງຕັ້ງໜ້າກວ່າເກົ່າແລະສືບຕໍ່ສ້າງສະພາບແວດລ້ອມທີ່ດີກວ່າເກົ່າແລະອຳນວຍຄວາມສະດວກໃນການບໍລິການທີ່ມີຄຸນນະພາບສູງກວ່າເກົ່າໃຫ້ແກ່ເພື່ອນມິດບັນດາປະເທດທີ່ມາເຮັດວຽກແລະດຳລົງຊີວິດຢູ່ຈີນ ທັງຈັດຕັ້ງປະຕິບັດມາດຕະການອຳນວຍຄວາມສະດວກຕ່າງໆເປັນຕົ້ນ ການອອກວິຊາທີ່ສາມາດໄປກັບຫຼາຍເທື່ອເປັນເວລາກຳນົດ 5ຫາ 10 ປີ, ອອກໃບອະນຸຍາດໃຫ້ຄົນຕ່າງປະເທດດຳລົງຊີວິດຢູ່ຈີນຖາວອນຫຼືບັດຂຽວໃຫ້ຫຼາຍກວ່າເກົ່າ, ຫຼຸດເງື່ອນໄຂໃນການຂໍດຳລົງຊີວິດຢູ່ຈີນຢ່າງຖາວອນແລະອື່ນໆ. ຫວັງວ່າ ຊ່ຽວຊານຕ່າງປະເທດຈະປະກອບສ່ວນໃຫ້ແກ່ການສ້າງສາພັດທະນາຂອງຈີນ ແລະຕັ້ງໜ້າເຂົ້າຮ່ວມການພັດທະນາຢ່າງມີການປະດິດສ້າງ, ການຍົກລະດັບອຸດສາຫະກຳ,ການປັບປຸງໂຄງປະກອບເສດຖະກິດຂອງຈີນເພື່ອຮ່ວມກັນຊົມໃຊ້ໂອກາດການພັດທະນານຳກັນ.
 |
