ໜັງສືພິມ "ການຄ້າຟິລິບປິນ" ລາຍງານວ່າ ຫວ່າງມໍ່ໆມານີ້, ຄະນະເຈົ້າໜ້າທີ່ຂັ້ນສູງຟິລິບປິນ ຈາກກະຊວງການຕ່າງປະເທດ, ກະຊວງງົບປະມານ, ທະນາຄານກາງຟິລິບປິນ ແລະອື່ນໆ ເຊິ່ງນຳພາໂດຍທ່ານຄາໂລສ ໂດມິງກັສ ລັດຖະມົນຕີກະຊວງການເງິນຟິລິບປິນ ໄດ້ເດີນທາງໄປຢ້ຽມຢາມສຳນັກງານໃຫຍ່ກຸ່ມບໍລິສັດອາລີບາບາ ເຊິ່ງເປັນບໍລິສັດດຳເນີນທຸລະກິດຜ່ານທາງເອເລັກໂຕຣານິກຂອງຈີນ ເພື່ອສຶກສາວ່າຈະເຮັດແນວໃດເພື່ອມາພັດທະນາການຄ້າເອເລັກໂຕຣານິກປະເທດຕົນ.
ທ່ານໂດມິງກັສ ກ່າວວ່າ: ຫວັງວ່າການທັດສະນະສຶກສາຄັ້ງນີ້ຈະເຮັດໃຫ້ຟິລິບປິນພັດທະນາທັນກັບປະເທດອື່ນ ແລະ ພັດທະນາແບບກ້າວກະໂດດ. ກ່ອນຈະເດີນທາງໄປບໍລິສັດດັ່ງກ່າວ, ທ່ານປະທານາທິບໍດີ ໂຣດຣີໂກ ດູເຕີເຕ ກໍໄດ້ສົນທະນາກັບຕົນເປັນພິເສດ ໂດຍໃຫ້ທ່ານຕ້ອງຖອດຖອນບົດຮຽນນຳອາລີບາບາ ແລະ ຈີນໃຫ້ຫຼາຍ ແລະ ນຳໃຊ້ຄວາມຮູ້ເຫຼົ່ານີ້ເຂົ້າໃນການແກ້ໄຂບັນຫາເສດຖະກິດ-ສັງຄົມ ປະເທດຕົນ.