ວັນທີ 6 ກຸມພານີ້ຕາມເວລາທ້ອງຖິ່ນ, ສະພາຄວາມໝັ້ນຄົງອົງການສະຫະປະຊາຊາດ ໄດ້ຈັດກອງປະຊຸມອະພິປາຍແບບເປີດເຜີຍກ່ຽວກັບວິທີເຮັດວຽກຂອງຕົນ ແລະ ທ່ານໝ໋າຈ່າວຊີ້ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດຄົນໃໝ່ ກໍໄດ້ປະກອບຄຳເຫັນ ໂດຍຊີ້ວ່າ: ການປະຕິຮູບສະພາຄວາມໝັ້ນຄົງ ຄວນຍຶດໝັ້ນແນວຄວາມຄິດແກ້ໄຂຮອບດ້ານ ເພື່ອສະແຫວງຫາແຜນການແກ້ໄຂບັນຫາແບບລວດດຽວ.
ທ່ານໝ໋າຈ່າວຊີ້ ກ່າວວ່າ: ຈີນສະໜັບສະໜູນໃນການປັບປຸງວິທີເຮັດວຽກຂອງສະພາຄວາມໝັ້ນຄົງຢ່າງບໍ່ຢຸດຢັ້ງ ເສີມສ້າງຄວາມສາມາດ ແລະ ປະສິດທິພາບຂອງການປະຕິບັດງານຂອງສະພາຄວາມໝັ້ນຄົງ ເພື່ອຮັບມືກັບໄພຂົ່ມຂູ່ຕໍ່ສັນຕິພາບແລະຄວາມໝັ້ນຄົງໃນໂລກຢ່າງມີປະສິດທິຜົນ ແຕ່ການປະຕິຮູບສະພາຄວາມໝັ້ນຄົງຄວນຊອກຫາທິດທາງທີ່ຖືກຕ້ອງ ຄື ໜຶ່ງ, ສຸມໃສ່ບັນຫາຈຸດສຸມ, ພ້ອມທັງຮັບປະກັນປະສິດທິຜົນຂອງການປະຕິບັດໜ້າທີ່. ສອງ, ຍຶດໝັ້ນປຶກສາຫາລືຢ່າງມີປະຊາທິປະໄຕ, ຮັບປະກັນການຕັດສິນນະໂຍບາຍແບບລວມໝູ່ ແລະ ສາມ, ເພີ່ມທະວີການແລກປ່ຽນຂໍ້ມູນຂ່າວສານ, ໃຫ້ຄວາມສຳຄັນຕໍ່ຄວາມເຫັນຂອງບັນດາຝ່າຍ.