ກອງປະຊຸມບໍ່ເປັນທາງການລັດຖະມົນຕີກະຊວງປ້ອງກັນປະເທດຈີນ-ອາຊຽນຄັ້ງທີ 8 ໄດ້ຈັດຂຶ້ນຢູ່ສິງກະໂປໃນວັນທີ 6 ກຸມພານີ້ ໂດຍການເປັນປະທານຮ່ວມຂອງທ່ານອຶງເອງເຮນ ລັດຖະມົນຕີກະຊວງປ້ອງກັນປະເທດສິງກະໂປ ປະເທດປະທານໝູນວຽນອາຊຽນ ແລະທ່ານສາງວ້ານສວນ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງປ້ອງກັນປະເທດຈີນ.
ທ່ານສາງວ້ານສວນ ກ່າວວ່າ: ຈີນຍຶດໝັ້ນເດີນຕາມເສັ້ນທາງພັດທະນາໂດຍສັນຕິ, ຖືເອົາອາຊຽນເປັນທິດທາງບຸລິມະສິດຂອງນະໂຍບາຍການຕ່າງປະເທດກັບປະເທດອ້ອມຂ້າງຂອງຈີນຢ່າງສະເໝີຕົ້ນສະເໝີປາຍ, ຍຶດໝັ້ນຮ່ວມກັບອາຊຽນເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ຄູ່ຮ່ວມທີ່ດີ ແລະຈະເລີນຮຸ່ງເຮືອງຮ່ວມກັນ, ມີຄວາມໝັ້ນຄົງຮ່ວມກັນ ແລະ ຮ່ວມທຸກຮ່ວມສຸກ. ໃນຊຸມປີຜ່ານມາ, ໂດຍປະຕິບັດຕາມຂໍ້ຕົກລົງຮ່ວມລະຫວ່າງທ່ານສີຈິ້ນຜິງ ປະທານປະເທດຈີນ ແລະ ຜູ້ນຳບັນດາປະເທດອາຊຽນ, ອົງການປ້ອງກັນປະເທດລະຫວ່າງຈີນແລະອາຊຽນໄດ້ໄປຕາມທ່າອ່ຽງຂອງຍຸກສະໄໝ, ກຳຈັດສິ່ງກີດຂວາງ, ໄວ້ເນື້ອເຊື່ອໃຈແລະເຂົ້າໃຈເຊິ່ງກັນແລະກັນ, ຮັກສາການແລກປ່ຽນ ແລະ ສຸມໃສ່ການຮ່ວມມືກັນ ໄດ້ເສີມຂະຫຍາຍບົດບາດຢ່າງຕັ້ງໜ້າຕໍ່ການປົກປັກຮັກສາສັນຕິພາບ ແລະ ສະຖຽນລະພາບໃນພາກພື້ນ. ຈີນຍິນດີສາມັກຄີກັບບັນດາປະເທດອາຊຽນ, ບໍ່ຫຼົງລືມອຸດົມການແຕ່ຫົວທີຂອງການຮ່ວມມື, ມີຄວາມໝັ້ນໃຈຢ່າງເດັດດ່ຽວຕໍ່ການຮ່ວມມື ແລະ ຮູ້ຈຸດສຳຄັນຂອງການຮ່ວມມືຢ່າງຖືກຕ້ອງ, ຊຸກຍູ້ປະຕິບັດແຜນການຝຶກຊ້ອມຮ່ວມທາງທະເລ, ການຮ່ວມມືຕ້ານລັດທິກໍ່ການຮ້າຍ ແລະອື່ນໆ ເພື່ອປະກອບສ່ວນອັນໃຫຍ່ຫຼວງກວ່າເກົ່າໃນການສ້າງປະຊາຄົມຮ່ວມຊາຕາກຳຈີນ-ອາຊຽນໃຫ້ແໜ້ນແຟ້ນຍິ່ງຂຶ້ນ.
ທ່ານອຶງເອງເຮນ ແລະລັດຖະມົນຕີປ້ອງກັນປະເທດອາຊຽນທ່ານອື່ນໆ ໄດ້ຕີລາຄາສູງຕໍ່ຂໍ້ລິເລີ່ມການສ້າງປະຊາຄົມຮ່ວມຊາຕາກຳຈີນ-ອາຊຽນ ທີ່ສະເໜີໂດຍທ່ານສີຈິ້ນຜິງ ປະທານປະເທດຈີນ ແລະ ຊົມເຊີຍຈີນຍຶດໝັ້ນເດີນຕາມເສັ້ນທາງພັດທະນາໂດຍສັນຕິ ທັງກ່າວວ່າ ຍິນດີຖືເອົາການສ້າງສາຍພົວພັນຄູ່ຮ່ວມຍຸດທະສາດອາຊຽນ-ຈີນຄົບຮອບ 15 ປີເປັນໂອກາດ, ສືບຕໍ່ຮັກສາການແລກປ່ຽນກັບຈີນຢ່າງແໜ້ນແຟ້ນ, ເພີ່ມທະວີການແລກປ່ຽນແລະຮ່ວມມືດ້ານການປ້ອງກັນປະເທດລະຫວ່າງສອງຝ່າຍ, ລົງເລິກໄມຕີຈິດມິດຕະພາບຖານບ້ານໃກ້ເຮືອນຄຽງ ແລະ ໄວ້ເນື້ອເຊື່ອໃຈທາງການເມືອງລະຫວ່າງສອງຝ່າຍ, ປົກປັກຮັກສາຄວາມໝັ້ນຄົງ ແລະການພັດທະນາຈະເລີນກ້າວໜ້າໃນພາກພື້ນ.
