ຕາມຂ່າວCRI: ວັນທີ 7 ກຸມພານີ້, ທ່ານ ລີວສຽວມິງ ຮອງລັດຖະມົນຕີກະຊວງຂົນສົ່ງແລະຄົມມະນາຄົມຈີນກ່າວວ່າ: ປັດຈຸບັນ,ຢູ່ຈີນໄດ້ມີລົດຖີບສາທາລະນະ 23 ລ້ານຄັນ ສ່ວນຈຳນວນຜູ້ລົງທະບຽນໃຊ້ນັ້ນຢ່າງໜ້ອຍມີ 200 ລ້ານຄົນ. ທ່ານກ່າວຕື່ມວ່າ: ຈີນຈະອອກແຈ້ງການສະບັບໃໝ່ໃນໄວໆນີ້ ເພື່ອຮັບປະກັນຄວາມປອດໄພຂອງເງິນມະຈຳລົດຖີບສາທາລະນະ.
ລົດຖີບສາທາລະນະພວມກາຍເປັນໜຶ່ງໃນວິຖີການເດີນທາງສີຂຽວທີ່ໄດ້ຮັບຄວາມນິຍົມຊົມຊອບຫຼາຍທີ່ສຸດຈາກປະຊາຊົນຈີນ,ແຕ່ວ່າໃນຂະນະທີ່ໃຊ້ລົດຖີບ,ການເອົາເງິນມະຈຳຄືນແມ່ນຍາກ,ການຈອດລົດທົ່ວທີບແລະບັນຫາອື່ນໆກໍ່ໄດ້ຖືກປະຊາຊົນຕຳນິມາໂດຍຕະຫຼອດ. ສຳລັບບັນຫາເງິນມະຈຳນັ້ນ,ທ່ານ ລີວສຽວມິງ ກ່າວວ່າ: ກະຊວງຂົນສົ່ງແລະຄົມມະນາຄົມຈີນໄດ້ຮ່ວມກັບທະນາຄານປະຊາຊົນຈີນ,ຄະນະກຳມະການຕິດຕາມກວດກາຂະແໜງການທະນາຄານແລະພາກສ່ວນອື່ນໆດຳເນີນການຄົ້ນຄວ້າກວດກາແລະເກັບກຳຂໍ້ມູນຄວາມເຫັນ,ໄດ້ວາງນະໂຍບາຍທີ່ກ່ຽວຂ້ອງແລະຄາດວ່າຈະອອກແຈ້ງການໃໝ່ໃນໄວໆນີ້,ຈຸດປະສົງຕົ້ນຕໍຂອງໃບແຈ້ງການສະບັບດັ່ງກ່າວແມ່ນເພື່ອຮັບປະກັນຄວາມປອດໄພຂອງເງິນມະຈຳລົດຖີບສາທາລະນະ.