ງານໂອແລມປິກລະດູໜາວຄັ້ງທີ 23 ຈະຈັດຂຶ້ນຢູ່ພຽງຊາງ ສ ເກົາຫຼີໃນວັນທີ 9 ກຸມພານີ້

ງານໂອແລມປິກລະດູໜາວຄັ້ງທີ 23 ຈະຈັດຂຶ້ນຢູ່ພຽງຊາງ ສ ເກົາຫຼີໃນວັນທີ 9 ກຸມພານີ້. ທ່ານຫຼີຮີປຶມ ປະທານຄະນະຈັດງານໂອແລມປິກລະດູໜາວພຽງຊາງກ່າວວ່າ: ວຽກງານກະກຽມຕ່າງໆຂອງງານໂອແລມປິກນີ້ໄດ້ສິ້ນສຸດລົງ, ປະເທດຕົນຈະພະຍາຍາມຈັດງານໂອແລມປິກຄັ້ງນີ້ໃຫ້ດີທີ່ສຸດ.

ງານໂອແລມປິກລະດູໜາວພຽງຊາງຈະໄຂຂຶ້ນຢູ່ສະໜາມກິລາໂອແລມປິກພຽງຊາງນັບແຕ່ຕອນຄ່ຳວັນທີ 9 ກຸມພານີ້. ຄະນະກຳມະການຈັດງານຄັ້ງນີ້ແຈ້ງໃຫ້ຮູ້ວ່າ: ມາຮອດປັດຈຸບັນນີ້, ມີນັກກິລາທັງໝົດ 2925 ຄົນຈາກ 92 ປະເທດຈະເຂົ້າຮ່ວມ ແລະມີເຈົ້າໜ້າທີ່ພ້ອມທັງອາສາສະໝັກທັງໝົດ 55684 ຄົນ ເຊິ່ງເປັນງານໂອແລມປິກທີ່ໃຫຍ່ທີ່ສຸດ. ຄະນະຜູ້ແທນ ແລະນັກກິລາ ສ ເກົາຫຼີ ແລະ ສປປ ເກົາຫຼີຈະຍົກທຸງແຫຼມເກົາຫຼີຮ່ວມກັນໃນພິທີເປີດ ເຊິ່ງຈະສະແດງເຖິງຄວາມມີນ້ຳໃຈແຫ່ງສັນຕິພາບຂອງງານໂອແລມປິກ.