ວັນທີ 8 ກຸມພານີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນ ແລະທ່ານຫງວຽນຟູຈອງ ເລຂາທິການໃຫຍ່ສູນກາງພັກກອມມູນິດຫວຽດນາມໄດ້ສົ່ງຈົດໝາຍອວຍພອນປີໃໝ່ແກ່ກັນ.
ເນື້ອໃນຈົດໝາຍອວຍພອນປີໃໝ່ຂອງທ່ານສີຈິ້ນຜິງມີບາງຕອນຂຽນວ່າ: ເນື່ອງໃນໂອກາດປີໃໝ່ ເຊິ່ງເປັນບຸນປະເພນີສຳຄັນຂອງປະຊາຊົນສອງຊາດຈີນ-ຫວຽດນາມຈະມາເຖິງ, ຂ້າພະເຈົ້າຂໍຕາງໜ້າພັກກອມມູນິດຈີນ,ປະຊາຊົນຈີນແລະໃນນາມສ່ວນຕົວ ຂໍຝາກຄວາມຢື້ຢາມຖາມຂ່າວທີ່ຈິງໃຈແລະພອນໄຊອັນປະເສີດໄປເຖິງສະຫາຍເລຂາທິການໃຫຍ່ ແລະຜ່ານຈາກສະຫາຍສົ່ງໄປເຖິງພັກກອມມູນິດຫວຽດນາມແລະປະຊາຊົນຫວຽດນາມ. ທ່ານສີຈິ້ນຜິງຢືນຢັນວ່າ: ການນຳຂັ້ນສູງຂອງສອງພັກສອງລັດໂດຍສະເພາະຜູ້ນຳສູງສຸດໄດ້ຮັກສາການຕິດຕໍ່ພົວພັນເປັນປະຈຳ ເຊິ່ງໄດ້ເສີມຂະຫຍາຍບົດບາດສຳຄັນໃນການນຳພາທາງຍຸດທະສາດຕໍ່ການເສີມຂະຫຍາຍສາຍພົວພັນລະຫວ່າງສອງຝ່າຍ. ຂ້າພະເຈົ້າຍິນດີຮັກສາການແລກປ່ຽນຢ່າງໃກ້ຊິດກັບສະຫາຍເລຂາທິການໃຫຍ່ເພື່ອຮ່ວມກັນຊຸກຍູ້ສາຍພົວພັນຈີນ-ຫວຽດນາມຂະຫຍາຍຕົວຢ່າງໜັກແໜ້ນແລະພັດທະນາກ້າວຂຶ້ນສູ່ລະດັບໃໝ່.
ສຳລັບຈົດໝາຍຂອງທ່ານຫງວຽນຟູຈອງໄດ້ລະບຸວ່າ: ເນື່ອງໃນໂອກາດບຸນປີໃໝ່ປີເປີກເສັດ ທີ່ເປັນບຸນປະເພນີສຳຄັນຂອງສອງຊາດຫວຽດນາມ-ຈີນຈະມາເຖິງນີ້, ຂ້າພະເຈົ້າຂໍຕາງໜ້າພັກແລະປະຊາຊົນຫວຽດນາມສົ່ງພອນໄຊອັນປະເສີດເຖິງທ່ານແລະຜ່ານຈາກທ່ານສົ່ງໄປເຖິງພັກແລະປະຊາຊົນຈີນ. ທ່ານຫງວຽນຟູຈອງຢືນຢັນວ່າ ປີຜ່ານມາ, ສາຍພົວພັນຫວຽດນາມ-ຈີນໄດ້ຮັກສາທ່ວງທ່າຂະຫຍາຍຕົວເປັນຢ່າງດີ, ຜູ້ນຳສູງສຸດຂອງສອງພັກສອງລັດໄດ້ແລກປ່ຽນຢ້ຽມຢາມກັນ, ການຮ່ວມມືໃນທຸກຂົງເຂດກໍໄດ້ຮັບຜົນສຳເລັດທີ່ດີ. ສຳລັບປີໃໝ່ 2018 ນີ້, ຫວັງວ່າສອງຝ່າຍຈະສຸມໃສ່ການປັບປຸງຄວາມໄວ້ເນື້ອເຊື່ອໃຈກັນທາງການເມືອງໃຫ້ໜັກແໜ້ນຂຶ້ນຕື່ມ, ຍົກສູງລະດັບແລະຄຸນນະພາບການຮ່ວມມືຕົວຈິງໃນຂົງເຂດຕ່າງໆ ແລະສືບຕໍ່ຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ-ຈີນຂະຫຍາຍຕົວໄປສູ່ທິດທາງທີ່ດີຢ່າງຕໍ່ເນື່ອງ.
 |
