ວັນທີ 8 ກຸມພານີ້, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ແລະ ທ່ານມູຊາ ຟາກີ ປະທານຄະນະກຳມາທິການສະຫະພາບອາຟຣິກາທີ່ເດີນທາງມາຢ້ຽມຢາມຈີນ ໄດ້ເຂົ້າຮ່ວມກອງປະຊຸມສົນທະນາຍຸດທະສາດຄັ້ງທີ 7 ລະຫວ່າງຈີນ-ອາຟຣິກາ ຈາກນັ້ນກໍໄດ້ຮ່ວມກັນຖະແຫຼງຂ່າວ ແລະມີນັກຂ່າວຖາມເຖິງເລື່ອງກ່ຽວກັບສື່ມວນຊົນປະເທດຕາເວັນຕົກໄດ້ປັ້ນຂ່າວທີ່ເອີ້ນວ່າ "ຈີນຕິດຕາມລັກຟັງສະຫະພາບອາຟຣິກາໂດຍອາໄສການຊ່ວຍສ້າງສູນປະຊຸມສະຫະພາບອາຟຣິກາ", ທ່ານຟາກີ ແລະ ທ່ານຫວາງຢີ້ ກໍໄດ້ກ່າວຕອບໂຕ້ເລື່ອງດັ່ງກ່າວ.
ທ່ານຟາກີ ກ່າວວ່າ: ສູນປະຊຸມສຳນັກງານໃຫຍ່ສະຫະພາບອາຟຣິກາ ແມ່ນຈີນຊ່ວຍສ້າງດ້ວຍນ້ຳໃຈເອື້ອເຟື້ອເພື່ອແຜ່, ຂະນະທີ່ສື່ມວນຊົນບາງສຳນັກໄດ້ປັ້ນແຕ່ງຂ່າວດັ່ງກ່າວຂຶ້ນມາກ່ອນຈະໄຂກອງປະຊຸມສຸດຍອດສະຫະພາບອາຟຣິການັ້ນ ບໍ່ແມ່ນເລື່ອງບັງເອີນຢ່າງເດັດຂາດ ຫາກເປັນການກະທຳທີ່ຕັ້ງໃຈເພື່ອປ່ອຍຂ່າວທີ່ບິດເບືອນຈາກຄວາມຈິງແລະຍຸແຫຍ່ແບ່ງແຍກ. ສະຫະພາບອາຟຣິກາ ເຫັນວ່າ ຈີນບໍ່ເຄີຍມີແນວຄິດແບບນີ້ແລະກໍບໍ່ມີຄວາມຈຳເປັນທີ່ຈະປະຕິບັດການແບບນີ້. ການພົວພັນລະຫວ່າງອາຟຣິກາ-ຈີນໝັ້ນຄົງຂະໜົງແກ່ນ ແລະໜ້າທີ່ຮ່ວມຂອງສອງຝ່າຍໃນຕໍ່ໜ້າແມ່ນເພີ່ມທະວີການຮ່ວມມື, ສ້າງຄວາມຜາສຸກໃຫ້ແກ່ປະຊາຊົນສອງຝ່າຍ. ສະນັ້ນ, ຄຳປ່າວຂ່າວຄືດັ່ງກ່າວນີ້ຈະບໍ່ກະທົບເຖິງສາຍພົວພັນລະຫວ່າງສອງຝ່າຍຢ່າງເດັດຂາດ ແລະ ບໍ່ອາດຈະເຮັດໃຫ້ພວກເຮົາຄິດໄປທາງອື່ນໄດ້.
ທ່ານຫວາງຢີ້ ກ່າວວ່າ: ການພົວພັນລະຫວ່າງຈີນ-ອາຟຣິກາໄດ້ທົດສອບຕໍ່ການປ່ຽນແປງຢ່າງໃຫຍ່ຫຼວງຂອງສະຖານະການສາກົນມາເປັນເວລາກວ່າເຄິ່ງສະຕະວັດ ແລະປັດຈຸບັນໄດ້ເຂົ້າສູ່ໄລຍະຄຳແລະພັດທະນາຢ່າງວ່ອງໄວແລ້ວ ແຕ່ມີບາງຄົນ, ບາງອິດທິກຳລັງຕົນເອງບໍ່ຍິນດີຊ່ວຍເຫຼືອອາຟຣິກາ ພັດຍັງມີຄວາມອິດສາຕໍ່ຜົນການຮ່ວມມືຂອງຈີນແລະອາຟຣິກາອີກດ້ວຍ. ໃນຕໍ່ໜ້າແຫ່ງກະແສປະຫວັດສາດການຮ່ວມມື ແລະ ຜົນງານຕ່າງໆທີ່ສອງຝ່າຍໄດ້ຮັບນັ້ນ, ບໍ່ວ່າຄຳປ່າວຂ່າວຫຍັງກໍຕາມຈະບໍ່ສາມາດບັງເກີດຜົນແຕ່ຢ່າງໃດ ແລະ ບໍ່ວ່າການຍຸແຫຍ່ແບ່ງແຍກໃນຮູບການໃດໆຂອງພວກເຂົາກໍບໍ່ສົມຫວັງຢ່າງເດັດຂາດ.
