ຫວ່າງມໍ່ໆມານີ້, ລັດຖະບານຈີນໄດ້ປະຕິບັດການເຄື່ອນໄຫວຕໍ່ຕ້ານກຸ່ມເຈົ້າພໍ່ຮອບໃໝ່, ຕົ້ນຕໍແນໃສ່ອິດທິກຳລັງເຈົ້າພໍ່ທ້ອງຖິ່ນຊືມເຂົ້າອົງການປົກຄອງທ້ອງຖິ່ນແລະປາກົດການກຸ່ມເຈົ້າພໍ່ກົດຂີ່ຂົ່ມເຫັງປະຊາຊົນ.
ພັກກອມມູນິດຈີນໃນຖານະເປັນພັກກຳອຳນາດ, ໄດ້ພະຍາຍາມສ້າງສະພາບແວດລ້ອມການດຳລົງຊີວິດທີ່ "ປະຊາຊົນຢູ່ດີມີແຮງ, ສັງຄົມສະຫງົບແລະປົກຄອງບ້ານເມືອງໃຫ້ຢູ່ຊຸ່ມກິນເຢັນເປັນເວລາຍາວນານ" ໃຫ້ແກ່ປະຊາຊົນຈີນຕະຫຼອດມາ. ເບິ່ງຈາກສະພາບພາຍໃນແລະຕ່າງປະເທດແລ້ວ, ຢາກສ້າງສະພາບແວດລ້ອມດັ່ງກ່າວແມ່ນທີ່ເລື່ອງບໍ່ງ່າຍປານໃດ. ຍ້ອນວ່າໃນດ້ານໜຶ່ງ, ຈີນມີເນື້ອທີ່ຢ່າງກວ້າງຂວາງ, ມີປະຊາກອນຫຼາຍກວ່າໝູ່ໃນໂລກ, ຄຽງຄູ່ກັບເສດຖະກິດພັດທະນາຢ່າງວ່ອງໄວໃນຫຼາຍປີມານີ້, ຂະໜາດການປັບປຸງຄືນໃໝ່ຂອງໂຄງປະກອບສັງຄົມແມ່ນບໍ່ເຄີຍມີມາກ່ອນ. ອີກດ້ານໜຶ່ງ, ສະພາບການຂອງທົ່ວໂລກບໍ່ໝັ້ນທ່ຽງ, ສະຖານະການອ້ອມຂ້າງບາງປະເທດສັບສົນຫຼາຍ, ມີປັດໄຈບໍ່ໝັ້ນທ່ຽງຢ່າງຫຼວງຫຼາຍ, ໄດ້ສ້າງຄວາມທ້າທາຍຕໍ່ການຄວບຄຸມສັງຄົມຂອງຈີນ.
ຜົນການສຳຫຼວດທີ່ກ່ຽວຂ້ອງສະແດງໃຫ້ເຫັນວ່າ, ຄະດີອາຊະຍະກຳດ້ວຍຄວາມຮຸນແຮງຂອງຈີນໃນປີ 2017 ໄດ້ຫຼຸດລົງ 51,8% ທຽບໃສ່ປີ 2012, ລະດັບຄວາມພໍໃຈຂອງປະຊາຊົນຕໍ່ຄວາມໝັ້ນຄົງທາງສັງຄົມຂຶ້ນເປັນ 95,55%. ປະຊາຊົນເຫັນວ່າຈີນແມ່ນໜຶ່ງໃນປະເທດທີ່ປອດໄພທີ່ສຸດໃນໂລກໄດ້ນັບມື້ນັບຫຼາຍຂຶ້ນ, ສັງຄົມມີຄວາມປອດໄພແລະເສດຖະກິດພັດທະນາຢ່າງວ່ອງໄວໄດ້ກາຍເປັນໂສມໜ້າຂອງຈີນທີ່ສະແດງຕໍ່ທົ່ວໂລກ.
ສິ່ງທີ່ໜ້າສົນໃຈກໍຄື, ຜົນງານດັ່ງກ່າວແມ່ນໄດ້ຮັບບົນພື້ນຖານທີ່ມີຕົ້ນທຶນຕ່ຳ. ຕາມຜົນການຄິດໄລ່ຫຼ້າສຸດຂອງອົງການຈັດຕັ້ງທີ່ກ່ຽວຂ້ອງຂອງອົງການສະຫະປະຊາຊາດ, ໃນປະເທດຕ່າງໆຂອງໂລກສະເລ່ຍຕາມຫົວຄົນແລ້ວ, ປະຊາກອນແຕ່ລະ 1 ແສນຄົນມີຕຳຫຼວດປະມານ 300 ຄົນ. ແຕ່ສະຖິຕິທີ່ກ່ຽວຂ້ອງສະແດງໃຫ້ເຫັນວ່າ, ປະຊາຊົນຈີນແຕ່ລະ 1 ແສນຄົນມີຕຳຫຼວດພຽງແຕ່ 140 ຄົນເທົ່ານັ້ນ, ຕ່ຳກວ່າລະດັບສະເລ່ຍຂອງໂລກຢ່າງຫຼວງຫຼາຍ.
ຈີນໃຊ້ຕຳຫຼວດມາດຕາສ່ວນຕ່ຳຊ່ຳນີ້ບັນລຸການຄຸ້ມຄອງຄວາມໝັ້ນຄົງທາງສັງຄົມຢ່າງມີປະສິດທິພາບສູງແມ່ນຍ້ອນຫຍັງ?
ການຄຸ້ມຄອງສັງຄົມຂອງຈີນບໍ່ແມ່ນໄດ້ບັນລຸຜົນເປັນຈິງໂດຍອາໄສແຕ່ການເພີ່ມທະວີແລະຍົກລະດັບອົງການປະຕິບັດກົດໝາຍເທົ່ານັ້ນ,ແຕ່ໄດ້ບັນລຸຜົນໂດຍຜ່ານການເສີມຂະຫຍາຍບົດບາດທີ່ມີຈຸດພິເສດແລະທ່າແຮງຂອງພັກກອມມູນິດຈີນຢ່າງເຕັມສ່ວນ ບົນພື້ນຖານສະພາບຕົວຈິງຂອງປະເທດຕົນ. ໂດຍສະເພາະແມ່ນນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ຈີນໄດ້ໃຊ້ການເຄື່ອນໄຫວຕ່າງໆເຊັ່ນ: ລົບລ້າງສັງຄົມມືດແລະກຳຈັດຄວາມຮຸນແຮງ,ຄວບຄຸມແລະຄຸ້ມຄອງລະເບີດແລະຍຶດປືນ,ປາບປາມຢາເສບຕິດ,ສິ່ງລາມົກອະນາຈານແລະອື່ນໆ,ໄດ້ສະກັດກັ້ນສະພາບການກໍ່ອາຊະຍາກຳຢ່າງມີປະສິດທິຜົນ,ເພີ່ມທະວີຄວາມຮູ້ສຶກຂອງປະຊາຊົນຕໍ່ການໄດ້ຮັບຄວາມຍຸດຕິທຳແລະຄວາມຊອບທຳ,ຮັບປະກັນໃຫ້ສັງຄົມມີຄວາມສະຫງົບຢ່າງຕໍ່ເນື່ອງແລະໝັ້ນຄົງ.
ໃນດ້ານຮູບແບບການຄຸ້ມຄອງທີ່ລະອຽດ,ພັກກອມມູນິດຈີນເຊື່ອໝັ້ນວ່າ "ການເດີນຕາມເສັ້ນທາງມວນຊົນ" ແມ່ນວິທີທີ່ດີທີ່ສຸດ,ໄດ້ກຳນົດຢ່າງຈະແຈ້ງທີ່ອົງການຮັກສາຄວາມສະຫງົບຂອງປະຊາຊົນທີ່ປະຕິບັດໜ້າທີ່ຕຳຫຼວດຕ້ອງຖື "ເສັ້ນທາງໂດຍພື້ນຖານແມ່ນເສັ້ນທາງມວນຊົນ" ແລະ "ທິດທາງໂດຍພື້ນຖານແມ່ນອົງການທີ່ກ່ຽວຂ້ອງທີ່ນຳໂດຍຄະນະພັກປະສົມປະສານກັນກັບທົ່ວປວງຊົນ" ເປັນຫຼັກການວຽກງານ. ໃນປີ 1952, ລັດຖະບານຈີນກໍ່ໄດ້ວາງກົດລະບຽບທີ່ກ່ຽວຂ້ອງ,ເພື່ອຮັບປະກັນໃຫ້ອຳນາດການປົກຄອງແລະອົງການຮັກສາຄວາມສະຫງົບຂັ້ນຕ່າງໆປະຕິບັດໜ້າທີ່ຄຸ້ມຄອງຄວາມສະຫງົບທາງສັງຄົມຕ່າງໆເຊັ່ນ:ການປ້ອງກັນແລະໂຈມຕີການກະທຳກໍ່ອາຊະຍາກຳເປັນຕົ້ນໂດຍຜ່ານການຊ່ວຍເຫຼືອຈາກປະຊາຊົນຂັ້ນທ້ອງຖິ່ນ. ເຊິ່ງໄວເກືອບ 30 ປີກວ່າປະເທດຕາເວັນຕົກທີ່ໄດ້ສະເໜີ "ວຽກງານຕຳຫຼວດຫັນເປັນແບບສັງຄົມ" ແລະ "ວຽກງານຕຳຫຼວດຢູ່ເຂດຊຸມຊົນ" ແລະທັດສະນະຄະຕິອື່ນໆໃນທ້າຍຊຸມປີ 1970 ແລະຕົ້ນຊຸມປີ 1980.
ຄຽງຄູ່ກັບການປະຕິຮູບແລະໄຂປະຕູສູ່ພາຍນອກຂອງຈີນເປັນຕົ້ນມາ, ອົງປະກອບສັງຄົມໄດ້ມີການປ່ຽນແປງຢ່າງໃຫຍ່ຫຼວງ,ການເຄື່ອນຍ້າຍຂອງປະຊາກອນນັບມື້ນັບເພີ່ມຫຼາຍຂຶ້ນ,ຄວາມຂັດແຍ້ງກັນທາງສັງຄົມກໍ່ມີຄວາມສັບສົນຢ່າງຫຼວງຫຼາຍ. ແນໃສ່ການປ່ຽນແປງໃໝ່ແບບນີ້, ພັກກອມມູນິດຈີນໄດ້ສະເໜີທັດສະນະຄະຕິທີ່ "ຄຸ້ມຄອງຄວາມສະຫງົບທາງສັງຄົມໂດຍລວມ" ຢ່າງມີຫົວຄິດປະດິດສ້າງ ບົນພື້ນຖານການຖອດຖອນບົດຮຽນທາງດ້ານປະຫວັດສາດແລະຖອດຖອນບົດຮຽນທິດສະດີດ້ານການຄຸ້ມຄອງສັງຄົມຍຸກປັດຈຸບັນຂອງຕາເວັນຕົກ,ແລະໄດ້ປັບປຸງໃຫ້ດີຂຶ້ນຢ່າງບໍ່ຢຸດຢັ້ງ,ຈຶ່ງໄດ້ພັດທະນາແລະກາຍເປັນທິດທາງຄື: "ການປ້ອງກັນແລະໂຈມຕີປະສານສົມທົບກັນ,ການປ້ອງກັນເປັນຫຼັກ,ນັກວິຊາການປະສານສົມທົບກັບມວນຊົນ ແລະ ອາໄສມວນຊົນ",ຈຶ່ງໄດ້ບັນລຸການປ້ອງກັນແລະຄຸ້ມຄອງການກະທຳທີ່ລະເມີດກົດໝາຍແລະກໍ່ອາຊະຍາກຳໂດຍພື້ນຖານ,ແກ້ໄຂປັດໄຈທີ່ສ້າງຄວາມບໍ່ສະຫງົບ,ປົກປັກຮັກສາຄວາມສະຫງົບທາງສັງຄົມໃຫ້ມີຄວາມໝັ້ນທ່ຽງຢ່າງຕໍ່ເນື່ອງ.
ພັກກອມມູນິດຈີນໄດ້ອາໄສປະຊາຊົນ ແລະ ເພື່ອປະຊາຊົນຢ່າງສະເໝີຕົ້ນສະເໝີປາຍ,ບັນລຸການຄຸ້ມຄອງໂດຍລັດຖະບານ,ການປັບປຸງສະພາບໃຫ້ດີຂຶ້ນຜ່ານທາງສັງຄົມ ແລະ ການຄຸ້ມຄອງໂດຍປະຊາຊົນເອງ, ສະນັ້ນຜ່ານການໃຊ້ຕຳຫຼວດທີ່ມີມາດຕາສ່ວນຕ່ຳຊ່ຳນີ້ ໄດ້ເຮັດໃຫ້ຈີນຢູ່ໃນແຖວໜ້າຂອງປະເທດທີ່ມີອັດຕາສ່ວນການກໍ່ອາຊະຍາກຳຕ່ຳ. ຮູບແບບການຄຸ້ມຄອງໂດຍລວມທີ່ຮັກສາຄວາມສະຫງົບທາງສັງຄົມດ້ວຍການລົງທຶນຕ່ຳແລະມີຄວາມໝັ້ນຄົງສູງແບບນີ້ ບໍ່ພຽງແຕ່ໄດ້ສະໜອງບົດຮຽນທີ່ສຳເລັດຜົນໃຫ້ແກ່ປະເທດອື່ນໆຢູ່ໃນໂລກເທົ່ານັ້ນ,ແຕ່ຍັງໄດ້ປະກອບສ່ວນທີ່ສຳຄັນຕໍ່ການຮັກສາສັນຕິພາບແລະສະຖຽນລະພາບຂອງໂລກອີກດ້ວຍ.