ໄລຍະນີ້ ຈີນກຳລັງຢູ່ໃນໄລຍະທີ່ມີການຄົມມະນາຄົມຂົນສົ່ງໃນຍາມບຸນກຸດຈີນ ເຊິ່ງຈະມີນັບເປັນ 100 ລ້ານກວ່າເທື່ອຄົນກັບເມືອບ້ານເກີດດ້ວຍການຂີ່ລົດໄຟ. ເມື່ອທຽບກັບຫຼາຍປີຜ່ານມາ ລົດໄຟປີນີ້ຈະມີຄວາມໄວສູງກວ່າ, ການບໍລິການກໍ່ມີຫຼາກຫຼາຍສີສັນຂຶ້ນຕື່ມ, ເຮັດໃຫ້ປະຊາຊົນຜູ້ທີ່ເດີນທາງເມືອຢາມບ້ານນັ້ນຈະໄດ້ຮັບຜົນປະໂຫຍດຈາກການປະຕິຮູບຂະແໜງການທາງລົດໄຟຈີນຢ່າງເລິກເຊິ່ງ.
ໃນບົດລາຍງານຂອງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນໄດ້ສະເໜີອອກມາຢ່າງຈະແຈ້ງວ່າ ຈະສ້າງປະເທດໃຫ້ເຂັ້ມແຂງດ້ວຍການສ້າງສາພັດທະນາຂະແໜງການ. ຮອດທ້າຍປີກາຍ, ໄລຍະທາງຂອງທາງລົດໄຟຈີນບັນລຸ 1 ແສນ 2 ໝື່ນ 7 ພັນກິໂລແມັດ, ທາງລົດໄຟຄວາມໄວສູງມີລວມຍາວ 25 ພັນກິໂລແມັດ, ຂະບວນລົດໄຟຄວາມໄວສູງມາດຕະຖານເພີ່ມຫຼາຍຂຶ້ນ, ການອອກເດີນທາງດ້ວຍລົດໄຟຄວາມໄວສູງໄດ້ກາຍເປັນການເລືອກຂອງປະຊາຊົນຈີນສ່ວນຫຼາຍ.
ວັນທີ 21 ກັນຍາປີ 2017 ທາງລົດໄຟຈີນໄດ້ປະຕິບັດງານຕາມແຜນທີ່ທາງລົດໄຟອັນໃໝ່ ເຊິ່ງຂະບວນລົດໄຟຄວາມໄວສູງ "ຟູຊິ່ງຮ້າວ" ໄດ້ບັນລຸຄວາມໄວ 350 ກິໂລແມັດ/ຊົ່ວໂມງ, ນີ້ສະແດງໃຫ້ເຫັນວ່າ ຈີນໄດ້ສ້າງນິມິດໝາຍອັນໃໝ່ໃນການທຸລະກິດທາງລົດໄຟຄວາມໄວສູງໃນທົ່ວໂລກ.
ນອກຈາກ ມີຄວາມໄວສູງຂຶ້ນແລ້ວ, ອີງຕາມຄວາມຕ້ອງການທີ່ຫຼາກຫຼາຍຂອງຕະຫຼາດຜູ້ໂດຍສານ, ພາກສ່ວນລົດໄຟຂອງຈີນຍັງສຸມໃສ່ການໃຫ້ບໍລິການທີ່ດີ, ນັບແຕ່ປີ 2017 ມາ, ພາກສ່ວນທາງລົດໄຟໄດ້ເພີ່ມການບໍລິການຕ່າງໆ ເຊັ່ນ ຈອງອາຫານຜ່ານທາງອິນເຕີແນັດເພື່ອກິນຢູ່ໃນລົດໄຟ, ເລືອກເອົາບ່ອນນັ່ງໄດ້, ຈ່າຍຄ່າປີ້ລົດໄຟໂດຍຜ່ານມືຖື ແລະມາດຕະການອື່ນໆ ເພື່ອໃຫ້ປະຊາຊົນສາມາດເດີນທາງຢ່າງສະດວກສະບາຍ.
 |
