ວັນທີ 9 ກຸມພານີ້, ຢູ່ທີ່ປັກກິ່ງ, ທ່ານວາງອີ້ ລັດຖະມົນຕີກະຊວງການຕ່າງປະເທດຈີນ ກັບ ທ່ານນາງໂຣດໂນ ມາຊູດີ ລັດຖະມົນຕີກະຊວງການຕ່າງປະເທດອິນໂດເນເຊຍຮ່ວມກັນເປັນປະທານໄຂກອງປະຊຸມຄະນະກຳມະການປະສົມກ່ຽວກັບການຮ່ວມມືສອງຝ່າຍລະຫວ່າງລັດຖະບານຈີນ-ອິນໂດເນເຊຍຄັ້ງທີ 3.
ທ່ານວາງອີ້ກ່າວວ່າ, ຈີນ - ອິນໂດເນເຊຍເປັນປະເທດໃກ້ຄຽງທີ່ສຳຄັນຂອງກັນແລະກັນ, ຈີນຖືສຳຄັນຕໍ່ການພົວພັນກັບອິນໂດເນເຊຍ. ປີນີ້ແມ່ນຈີນ - ອິນໂດເນເຊຍສ້າງການພົວພັນຄູ່ຍຸດທະສາດຮອບດ້ານຄົບຮອບ 5 ປີ, ຈີນຍິນດີຮ່ວມມືກັບອິນໂດເນເຊຍເພື່ອໃຫ້ການໄປມາຫາສູ່ລະຫວ່າງການນຳຂັ້ນສູງຮັດແໜ້ນຕື່ມອີກ, ພ້ອມກັນຊຸກຍູ້ການຮ່ວມມື "ໜຶ່ງແລວທາງໜຶ່ງເສັ້ນທາງ", ຊຸກຍູ້ໃຫ້ການພົວພັນຈີນ-ອິນໂດເນເຊຍຂະຫຍາຍຕົວລົງສູ່ລວງເລິກ ແລະ ຮອບດ້ານ. ໂຄງການທາງລົດໄຟຄວາມໄວສູງຈາກາຕາ-ບັນດົງແມ່ນໂຄງການສຳຄັນທີ່ມີລັກສະນະສັນຍະລັກໃນການຮ່ວມກັນສ້າງ "ໜຶ່ງແລວທາງໜຶ່ງເສັ້ນທາງ"ຂອງສອງປະເທດ, ຈີນຍິນດີປະສານສົມທົບກັບອິນໂດເນເຊຍຢ່າງໃກ້ຊິດ ຊຸກຍູ້ໂຄງການນີ້ເລິ່ມກໍ່ສ້າງຢ່າງຮອບດ້ານໂດຍໄວ.
ທ່ານວາງອີ້ກ່າວວ່າ, ຈີນເອົາໃຈໃສ່ນຳບົດບາດຂອງອິນໂດເນເຊຍຢູ່ໃນອາຊຽນ, ຍິນດີຮ່ວມມືກັບອິນໂດເນເຊຍພ້ອມກັນທຳຄວາມພະຍາຍາມ ຖືການສ້າງການພົວພັນຄູ່ຍຸດທະສາດຈີນ-ອາຊຽນຄົບຮອບ 15 ປີໃນປີນີ້ເປັນໂອກາດ, ຍົກລະດັບຂອງການພົວພັນຈີນ-ອາຊຽນໃຫ້ສູງຂຶ້ນ,ເພີ່ມພະລັງຊີວິດຊີວາອັນໃໝ່ເຂົ້າໃນການ ສ້າງປະຊາຄົມອາຊຽນ ແລະ ຂະບວນການ ເຊື່ອມໂຍງເຂົ້າກັນໃນພາກພື້ນ. ຈີນຍິນດີຮ່ວມກັບອິນໂດເນເຊຍ ຕັ້ງໜ້າຮັບໜ້າທີ່ສາກົນ ແລະ ຮ່ວມກັນແກ້ໄຂກັບບັນຫາສາກົນ ແລະ ພາກພື້ນທີ່ສຳຄັນ, ພ້ອມກັນສ້າງການພົວພັນສາກົນແບບໃໝ່.