(ທ່ານສີຈິ້ນຜິງກ່າວຄຳອວຍພອນປີໃໝ່ກຸດຈີນໄປຍັງປະຊາຊົນທົ່ວປະເທດຈີນ)
ຕອນເຊົ້າວັນທີ 14 ກຸມພານີ້ ສູນກາງພັກກອມມູນິດຈີນ ແລະລັດຖະບານຈີນໄດ້ຈັດພິທີສະເຫຼີມສະຫຼອງ ແລະອວຍພອນບຸນປີໃໝ່ ຫຼືກຸດຈີນ 2018 ເຊິ່ງທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນໄດ້ກ່າວຄຳເຫັນທີ່ສຳຄັນໂດຍຊີ້ອອກວ່າ, ໃຫ້ພວກເຮົາຈົ່ງບໍ່ລືມອຸດົມການ, ຈົດຈຳພາລະກຳ ສືບຕໍ່ຂຽນໜ້າໃໝ່ແຫ່ງປະຫວັດສາດກ່ຽວກັບການສູ້ຊົນຄັ້ງຍິ່ງໃຫຍ່ຂອງປະຊາຊົນຈີນ 1 ຕື້ 300 ລ້ານກວ່າຄົນ.
ມື້ດຽວກັນ ບຸກຄົນວົງການຕ່າງໆ 2000 ກວ່າຄົນໄດ້ເຕົ້າໂຮມກັນຢູ່ທີ່ຫໍລ້ຽງອາຫານຂອງຫໍສະພາປະຊາຊົນແຫ່ງຊາດຈີນ, ທ່ານສີຈິ້ນຜິງໄດ້ກ່າວຄຳເຫັນວ່າ:
ເນຶ່ອງໃນໂອກາດບຸນກຸດຈີນ ບຸນປະເພນີທີ່ສຳຄັນທີ່ທຸດຂອງຊາວຈີນວຽນມາເຖິງ ພວກເຮົາມາເຕົ້າໂຮມກັນຢູ່ແຫ່ງນີ້ ເພື່ອອຳລາປີເກົ່າ ຕ້ອນຮັບປີໃໝ່ ມີຄວາມປິຕິຊົມຊື່ນເປັນຢ່າງຍິ່ງ. ກ່ອນອື່ນ ຂ້າພະເຈົ້າຂໍຕາງໜ້າສູນກາງພັກ ແລະລັດຖະບານສະແດງຄວາມອວຍພອນອັນປະເສີດໃນຍາມບຸນມາຍັງບັນດາທ່ານ! ອວຍພອນປີໃໝ່ໄປຍັງປະຊາຊົນບັນດາເຜົ່າໃນທົ່ວປະເທດຈີນ, ພີ່ນ້ອງຮ່ວມຊາດເຂດພິເສດຮົງກົງ ມາກາວ ພີ່ນ້ອງໄຕ້ຫວັນ ແລະຈີນຕ່າງດ້າວ ແລະຊາວຈີນທີ່ອາໃສຢູ່ຕ່າງປະເທດ. ຂໍອວຍພອນໃຫ້ບັນດາທ່ານຈົ່ງປະສົບຄວາມສີລິມຸງຄຸນໃນບຸນກຸດຈີນ!
ໃນປີ 2017 ທີ່ຫາກໍ່ຜ່ານພົ້ນໄປ ຈີນໄດ້ຮັບຜົນສຳເລັດທີ່ສຳຄັນອັນໃໝ່ໃນວຽກງານທຸກດ້ານຂອງສັງຄົມນິຍົມທີ່ມີສີສັນພິເສດຂອງຈີນ ເຊິ່ງນອກຈາກ ລວມຍອດ GDP ຫຼາຍກວ່າ 8200 ຕື້ຢວນ, ຈັງຫວະເຕີບໂຕທາງເສດຖະກິດບັນລຸ 6,9% ເຮັດໃຫ້ທົ່ວໂລກຕື່ນເຕັ້ນນຳແລ້ວ, ຈີນຍັງໄດ້ຮັບການບຸກທະລຸໃນດ້ານການລົງເລິກດຳເນີນການປະຕິຮູບ, ລົງເລິກການປົກຄອງປະເທດດ້ວຍກົດໝາຍ, ຊີວິດການເປັນຢູ່ຂອງປະຊາຊົນສືບຕໍ່ໄດ້ຮັບການປັບປຸງດີຂຶ້ນ, ການຫຼຸດຜ່ອນຄວາມທຸກຍາກກໍ່ໄດ້ຮັບການຊຸກຍູ້ກ້າວໄປໜ້າ,ການສ້າງສາດ້ານການປ້ອງກັນປະເທດແລະກອງທັບມີສະພາບການໃໝ່, ການຕ່າງປະເທດຮອບດ້ານໄດ້ຮັບຜົນງານຢ່າງອຸດົມສົມບູນ, ການຄຸ້ມຄອງພັກຢ່າງເຂັ້ມງວດກໍ່ໄດ້ກ້າວໄປໜ້າເລື້ອຍໆ. ໂດຍສະເພາະແມ່ນກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນໄດ້ໄຂຂຶ້ນຢ່າງມີໄຊ, ອັນໄດ້ຊີ້ແຈງທິດຂະຫຍາຍຕົວຂອງສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ ແລະເປີດຂະບວນການໃໝ່ແຫ່ງການສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ.
ປີ 2018 ແມ່ນປີເລີ່ມຕົ້ນແຫ່ງການປະຕິບັດຕາມເນື້ອໃນຈິດໃຈຂອງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນຢ່າງຮອບດ້ານ ແມ່ນປີທີ່ສຳຄັນຂອງການສ້າງສັງຄົມທີ່ອີ່ມໜຳສຳລານຢ່າງຮອບດ້ານ ແລະບັນລຸແຜນການພັດທະນາ 5 ປີຄັ້ງທີ 13 ທັງແມ່ນປີທີ່ຄົບຮອບ 40 ປີຂອງການດຳເນີນການປະຕິຮູບແລະໄຂປະຕູສູ່ພາຍນອກ. ໃນເວລາປະກອບຄຳເຫັນ, ທ່ານສີຈິ້ນຜິງກໍ່ໄດ້ໃຫ້ການຊີ້ແຈງຕໍ່ການພັດທະນາຂອງຈີນໃນປີ 2018.
ໃນເວລາກ່າວຄຳອວຍພອນປີໃໝ່ສາກົນ 2018, ທ່ານສີຈິ້ນຜິງເຄີຍກ່າວວ່: ຄວາມຜາສຸກແມ່ນໄດ້ມາຈາກການສູ້ຊົນ. ໃນພິທີສະຫຼອງບຸນກຸດຈີນໃນວັນທີ 14 ກຸມພານີ້ ທ່ານສີຈິິ້ນຜິງໄດ້ມີການອະທິບາຍຕື່ມຕໍ່ຄຳເວົ້າດັ່ງກ່າວ:
ມື້ນີ້ ຂ້າພະເຈົ້າຍັງຊິເວົ້າວ່າ, ການສູ້ຊົນນັ້ນເອງກໍ່ຄືຄວາມຜາສຸກອີກຢ່າງໜຶ່ງ. ຊີວິດທີ່ສູ້ຊົນຈິ່ງຖືເປັນຊີວິດທີ່ມີສຸກ. ຍຸກໃໝ່ແມ່ນຍຸກຂອງຜູ້ສູ້ຊົນ. ພວກເຮົາຕ້ອງຍຶດໝັ້ນຖືເອົາການຄອງຄອຍຕໍ່ຊີວິດການເປັນຢູ່ອັນດີງາມຂອງປະຊາຊົນນັ້ນເປັນເປົ້າໝາຍສູ້ຊົນ, ສູ້ຊົນຢ່າງບໍ່ລົດລະເພື່ອປະຊາຊົນ, ແລະສູ້ຊົນຮ່ວມກັບປະຊາຊົນ, ຜັນຂະຫຍາຍນ້ຳໃຈສູ້ຊົນເຂົ້າໃນຂະບວນການທີ່ສ້າງກິດຈະກຳອັນຍິ່ງໃຫຍ່, ຊຸກຍູ້ພາລະກິດອັນຍິ່ງໃຫຍ່ແລະບັນລຸຄວາມຝັນອັນຍິ່ງໃຫຍ່ນັ້ນຢ່າງແທ້ຈິງ, ຈໍ່ຕົວເປັນສະຖານະການທີ່ແຂ່ງຂັນກັນບາກບັ່ນສູ້ຊົນ, ສາມັກຄີກັນບາກບັ່ນສູ້ຊົນ. ຕະຫຼອດ 40 ປີທີ່ດຳເນີນການປະຕິຮູບແລະໄຂປະຕູສູ່ພາຍນອກ, ພວກເຮົາໄດ້ສ້າງທາງໃໝ່ ທັງເປັນທາງດີເສັ້ນໜຶ່ງອອກມາດ້ວຍຄວາມອາດຫານທີ່ກ້າສູ້ຊົນ ແລະປະຕິຮູບຕົນເອງ, ໄດ້ບັນລຸການກ້າວກະໂດດຈາກການໃຫ້ຕົນເອງທັນກັບຍຸກສະໄໝກາຍມາເປັນການນຳພາຍຸກສະໄໝ. ມື້ນີ້ ໃຫ້ພວກເຮົາຈົ່ງບໍ່ລືມອຸດົມການ ຈົດຈຳພາລະກຳ, ສືບຕໍ່ສ້າງສະພາບການໃໝ່ໃຫ້ແກ່ການປະຕິຮູບສັງຄົມອັນຍິ່ງໃຫຍ່, ສ້າງຕົນເອງໃຫ້ເຂັ້ມແຂງດ້ວຍການປະຕິຮູບຕໍ່ຕົນເອງອັນຍິ່ງໃຫຍ່ ດ້ວຍນ້ຳໃຈບາກບັ່ນສູ້ຊົນ, ສືບຕໍ່ຂຽນໜ້າໃໝ່ແຫ່ງປະຫວັດສາດກ່ຽວກັບການບາກບັ່ນສູ້ຊົນອັນຍິ່ງໃຫຍ່ຂອງປະຊາຊົນຈີນ 1 ຕື້ 300 ລ້ານກວ່າຄົນບົນແຜ່ນດິນ ອັນກວ້າງໃຫຍ່ໄພ່ສານຂອງປະເທດຈີນ.
