ຕາມຂ່າວສານຈີນ: ເນື່ອງໃນໂອກາດປີໃໝ່ປີຈໍຕາມຈັນທະຄະຕິຈີນໄດ້ວຽນມາເຖິງນີ້, ຜູ້ນຳຂອງຫຼາຍປະເທດແລະອົງການຈັດຕັ້ງສາກົນໄດ້ສະແດງຄວາມອວຍພອນອັນປະເສີດໄປຍັງປະຊາຊົນຈີນ.
ວັນທີ 14 ກຸມພານີ້, ທ່ານອັນໂຕນິອໍ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດໄດ້ຖ່າຍວິດີໂອລົງເວັບໄຊທາງການຂອງອົງການສະຫະປະຊາຊາດ, ສົ່ງຄວາມອວຍພອນປີໃໝ່ປີຈໍໃຫ້ແກ່ປະຊາຊົນຈີນດ້ວຍພາສາຈີນ. ທ່ານກູເຕີເຣັສຍັງໄດ້ສະແດງຄວາມຂອບອົກຂອບໃຈຕໍ່ຈີນແລະປະຊາຊົນຈີນທີ່ໄດ້ໃຫ້ການສະໜັບສະໜູນຕໍ່ວຽກງານຂອງສະຫະປະຊາຊາດ.
ທ່ານເທັດຣົສ ແອັດຮານົມ ເກເບຼເຢສຸສ ຜູ້ອຳນວຍການໃຫຍ່ອົງການອະນາໄມໂລກຫຼື WHO ໄດ້ກ່າວຄຳອວຍພອນບຸນກຸດຈີນຕໍ່ປະຊາຊົນຈີນຢູ່ສຳນັກງານອົງການສະຫະປະຊາຊາດປະຈຳເຊີແນວ. ທ່ານກ່າວວ່າ: ໃນເດືອນສິງຫາປີ 2017, ທ່ານໄດ້ໄປຢ້ຽມຢາມຈີນເປັນຄັ້ງທຳອິດພາຍຫຼັງໄດ້ດຳລົງຕຳແໜ່ງຜູ້ອຳນວຍການໃຫຍ່ WHO, ໃນໄລຍະຢ້ຽມຢາມ, ທ່ານໄດ້ພົບປະເຈລະຈາກັບຜູ້ນຳຈີນຢ່າງມີຜົນສຳເລັດ, ສອງຝ່າຍໄດ້ບັນລຸຄວາມຮັບຮູ້ທີ່ເປັນເອກະພາບກັນຫຼາຍຢ່າງກ່ຽວກັບການສ້າງການພົວພັນຮ່ວມມືຍຸດທະສາດ. ທ່ານສະແດງຄວາມຂອບໃຈຕໍ່ຈີນທີ່ໄດ້ໃຫ້ການສະໜັບສະໜູນຕໍ່ WHO ມາເປັນເວລາຍາວນານ, ແລະກ່າວວ່າສອງຝ່າຍຈະເປີດກວ້າງການຮ່ວມມືພາຍໃຕ້ຂອບ"ໜຶ່ງແລວທາງໜຶ່ງເສັ້ນທາງ".
ທ່ານນາງເທເຣຊາ ມາຣີ ເມ ນາຍົກລັດຖະມົນຕີອັງກິດໄດ້ຖ່າຍວິດີໂອລົງບຼອກ, ສະແດງຄວາມອວຍພອນອັນປະເສີດຕໍ່ໝົດທຸກຄົນທີ່ກຳລັງສະຫຼອງບຸນກຸດຈີນ. ທ່ານນາງກ່າວວ່າ: ນີ້ແມ່ນເວລາທີ່ສະຫຼຸບປີເກົ່າ ແລະຕ້ອນຮັບປີໃໝ່, ຂອບໃຈນຳຄຸ້ມຊາວຈີນຂອງອັງກິດທີ່ໄດ້ປະກອບສ່ວນອັນດີເດັ່ນເຂົ້າໃນສັງຄົມອັງກິດ.
ນອກຈາກນີ້, ຜູ້ນຳຂອງຫຼາຍປະເທດເຊັ່ນ ບົສນີເຮີເຊໂກວິນາ ສາທາລະນະລັດແອສໂຕນີ ສາທາລະນະລັດແຊັກບີ ແລະອື່ນໆກໍໄດ້ສະແດງຄວາມອວຍພອນບຸນກຸດຈີນດ້ວຍຮູບການຕ່າງໆ.
 |
