(ອົງການຈັດຕັ້ງຊາວຈີນທີ່ຢູ່ລາວອວຍພອນປີໃໝ່ຈີນຢູ່ສະຖານທູດຈີນປະຈຳ ສປປ ລາວ)
ຕາມຂ່າວ CRI: ວັນທີ 16 ກຸມພານີ້ ເຊິ່ງເປັນມື້ຂຶ້ນປີໃໝ່ປີຈໍ ຕາມຈັນທະຄະຕິຂອງຈີນ, ທ່ານນາງຫຼີຢ້ຽນຈີ່ນ ປະທານສະມາຄົມຈີນນະຄອນຫຼວງວຽງຈັນຂອງ ສປປ ລາວໄດ້ນຳພາຄະນະຜູ້ແທນອົງການຈັດຕັ້ງຊາວຈີນທີ່ນະຄອນຫຼວງວຽງຈັນເດີນທາງໄປສະຖານທູດຈີນ ປະຈຳ ສປປ ລາວເພື່ອອວຍພອນປີໃໝ່ຈີນຕໍ່ທ່ານຫວາງເວີນຖ່ຽນ ເອກອັກຄະລັດຖະທູດຈີນປະຈຳ ສປປ ລາວພ້ອມພັນລະຍາຍ ແລະພະນັກງານທຸກຖ້ວນໜ້າຂອງສະຖານທູດ.
ທ່ານຫວາງເວີນຖ່ຽນໄດ້ສະແດງຄວາມຍິນດີຕ້ອຮັບແລະຂອບອົກຂອບໃຈຕໍ່ສະມາຄົມຈີນນະຄອນຫຼວງວຽງຈັນ ແລະຜູ້ຕາງໜ້າຊາວຈີນທີ່ຢູ່ລາວ, ແລະຂໍອວຍພອນໃຫ້ຊາວຈີນແລະຈີນຕ່າງດ້າວທີ່ອາໄສຢູ່ລາວຈົ່ງມີສຸກຂະພາບເຂັ້ມແຂງ, ສົມຫວັງທຸກປະການ ແລະອວຍພອນໃຫ້ວຽກງານຂອງອົງການຈັດຕັ້ງຊາວຈີນຈົ່ງປະສົບຜົນສຳເລັດເລື້ອຍໆ.
ຢູ່ໃນເດີ່ນຫຍ້າຂອງສະຖານທູດ, ສະມາຊິກໄວໜຸ່ມເຍົາວະຊົນຊາວຈີນຂອງຄະນະເຊີດສິງທີ່ຂຶ້ນກັບສະມາຄົມຈີນນະຄອນຫຼວງວຽງຈັນໄດ້ນຸ່ງຖືຢ່າງສວຍງາມ ແລະສະແດງການເຊີດສິງ ກັງຟູແລະລາຍການອື່ນໆໃນທ່າມກາງສຽງໝາກກະໂພກແລະສຽງຄ້ອງສຽງກອງທີ່ຄຶກຄື້ນມ່ວນຊື່ນ. ການສະແດງອັນຍອດຢ້ຽມໄດ້ເຮັດໃຫ້ຊາວຈີນທີ່ຊົມຢູ່ກັບທີ່ນັ້ນຕົບມືໄຊໂຍໂຮຮ້ອງ ພາໃຫ້ປະຊາຊົນນະຄອນຫຼວງວຽງຈັນທີ່ເດີນທາງໄປມານັ້ນພາກັນຢຸດຢືນເບິ່ງດ້ວຍຄວາມສົນໃຈ.