ຕາມຂ່າວCRI: ວັນທີ 16 ກຸມພານີ້ ຕາມເວລາທ້ອງຖິ່ນ, ກອງປະຊຸມຄວາມໝັ້ນຄົງມູນິດຄັ້ງທີ 54 ໄດ້ຈັດຂຶ້ນຢູ່ມູນິດ ຕົວເມືອງພາກໃຕ້ຂອງເຢຍລະມັນ, ປະມຸກລັດ ແລະ ຜູ້ນຳລັດຖະບານຂອງ 20 ກວ່າປະເທດ, ລັດຖະມົນຕີການຕ່າງປະເທດປະມານ 40 ທ່ານ ແລະ ລັດຖະມົນຕີປ້ອງກັນປະເທດ 40 ທ່ານໄດ້ເຂົ້າຮ່ວມກອງປະຊຸມເທື່ອນີ້. ທ່ານນາງຟູ້ອີ໋ງ ຫົວໜ້າກຳມະການຂອງຄະນະກຳມະການການຕ່າງປະເທດສະພາປະຊາຊົນແຫ່ງຊາດຈີນຕາງໜ້າປະເທດຈີນເຂົ້າຮ່ວມກອງປະຊຸມປີນີ້ອີກເທື່ອໜຶ່ງ.
ກອງປະຊຸມປີນີ້ໄດ້ສຸມໃສ່ຫົວຂໍ້ສຳຄັນຕ່າງໆ ເຊັ່ນ, ຄວາມໝັ້ນຄົງເອີລົບ, ວິກິດການທີ່ເກີດຂຶ້ນຢູ່ພາກພື້ນ ,ການຄວບຄຸມເຄື່ອງອຸປະກອນທາງການທະຫານ ແລະ ອື່ນໆ. ໃນພິທີໄຂປະຊຸມ, ທ່ານໂວຟກາງ ອີຊິນເກີ ປະທານກອງປະຊຸມຄວາມໝັ້ນຄົງມູນິດກ່າວວ່າ, ປັດຈຸບັນ, ການພັດທະນາ ແລະ ຄວາມສ່ຽງຢູ່ໃນປະຊາຄົມໂລກຮ່ວມກັນ. ການໄປມາຫາສູ່ກັນລະຫວ່າງປະເທດຕ່າງໆໃນໂລກນັບມື້ນັບແໜ້ນແຟ້ນ, ແຕ່ກໍ່ໄດ້ເກີດຂໍ້ຂັດແຍ້ງ ແລະ ການປະທະກັນຫຼາຍຂຶ້ນ.
ໃນຫຼາຍປີມໍ່ໆມານີ້, ຢູ່ເອີລົບໄດ້ມີສິ່ງທ້າທາຍຈຳນວນຫຼາຍ ເຊັ່ນ, ອັງກິດຖອນອອກຈາກສະຫະພາບເອີລົບ, ຊາວອົບພະຍົບເຂົ້າສູ່ປະເທດເອີລົບຢ່າງຫຼວງຫຼາຍ ແລະ ລັດທິກໍ່ການຮ້າຍເປັນຕົ້ນ. ໃນຖານະທີ່ເປັນເຈົ້າພາບຈັດກອງປະຊຸມຄວາມໝັ້ນຄົງມູນິດ, ໃນເວລາກ່າຄຳປາໄສ, ທ່ານອົວຊູລາ ວົນ ເຕີ ໄລເອັນ ລັດຖະມົນຕີກະຊວງປ້ອງກັນປະເທດເຢຍລະມັນໄດ້ເນັ້ນເຖິງຄວາມສຳຄັນທີ່ເອີລົບຄວນເປັນອັນໜຶ່ງອັນດຽວກັນ.
ກອງປະຊຸມເທື່ອນີ້ຈະຈັດຂຶ້ນຮອດວັນທີ 18 ເດືອນນີ້. ໃນສອງມື້ຕໍ່ໜ້ານີ້, ນອກຈາກຄວາມໝັ້ນຄົງຂອງເອີລົບ, ຜູ້ຮ່ວມປະຊຸມຍັງຈະຫາລືກ່ຽວກັບຫົວຂໍ້ຕ່າງໆ ເຊັ່ນ, ການພົວພັນຂ້າມມະຫາສະໝຸດອັດລັງຕິກ, ສະຖານະການຕາເວັນອອກກາງ ແລະ ບັນຫານິວເຄຼຍແຫຼມເກົາຫຼີເປັນຕົ້ນ.
