ຕາມຂ່າວ CRI: ຫວ່າງມໍ່ໆນີ້, ຫ້ອງການຫຼຸດຜ່ອນຄວາມທຸກຍາກຂອງລັດຖະບານຈີນແຈ້ງໃຫ້ຮູ້ວ່າ: ພາຍຫຼັງກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນ, ຈີນໄດ້ສ້າງສະຖິຕິໃໝ່ໃນປະຫວັດຫຼຸດຜ່ອນຄວາມທຸກຍາກ ຄື ໄດ້ຫຼຸດຜ່ອນຄວາມທຸກຍາກໃຫ້ແກ່ 68 ລ້ານ 5 ແສນ 3 ໝື່ນຄົນ, ໄດ້ຫຼຸດຈຳນວນປະຊາກອນທີ່ທຸກຍາກທີ່ສຸດ 2 ສ່ວນ 3 ຂຶ້ນໄປ, ສະເລ່ຍແລ້ວໄດ້ຫຼຸດຫຼາຍກວ່າ 13 ລ້ານຄົນຕໍ່ປີ, ອັດຕາຄວາມທຸກຍາກໄດ້ຫຼຸດຈາກ 10,2% ເມື່ອປີ 2012 ລົງເຖິງ 3,1%, ການລົບລ້າງຄວາມທຸກຍາກຂອງຈີນໄດ້ຮັບຄວາມຄືບໜ້າຢ່າງໃຫຍ່.
ທ່ານຫຼິວຢົງຟູ້ ຫົວໜ້າຫ້ອງການຫຼຸດຜ່ອນຄວາມທຸກຍາກຂອງລັດຖະບານຈີນກ່າວວ່າ: "ຄວາມຄືບໜ້າຢ່າງໃຫຍ່ດັ່ງກ່າວ, ໝາຍຄວາມວ່າ ການຕໍ່ສູ້ລົບລ້າງຄວາມທຸກຍາກໄດ້ມີທ່ວງທ່າທີ່ແນ່ນອນ, ສາມາດກຳກັບສະພາບລວມໄດ້."ພຶດຕິກຳໄດ້ຢັ້ງຢືນໃຫ້ເຫັນວ່າ: ນະໂຍບາຍແລະການຈັດວາງຂອງສູນກາງພັກກ່ຽວກັບການລົບລ້າງຄວາມທຸກຍາກແມ່ນຖືກຕ້ອງທັງໝົດ, ທິດທາງພື້ນຖານທີ່ລົບລ້າງຄວາມທຸກຍາກຢ່າງແມ່ນຢຳແມ່ນຖືກຕ້ອງທັງໝົດ, ການອອກແບບແລະມາດຕະການໃນການລົບລ້າງຄວາມທຸກຍາກແມ່ນຖືກຕ້ອງທັງໝົດ ເຊິ່ງໄດ້ແກ້ໄຂບັນຫາຕ່າງໆເຊັ່ນ "ຊ່ວຍໃຜ" "ໃຜມາຊ່ວຍ" "ຊ່ວຍແນວໃດ" "ເຊົາຊ່ວຍແນວໃດ" ແລະອື່ນໆ.
ຂໍ້ມູນສະແດງໃຫ້ເຫັນວ່າ: ປະຈຸບັນ, ຍັງມີ 5 ແຂວງແລະເຂດປົກຄອງຕົນເອງມີປະຊາກອນທຸກຍາກຫຼາຍກວ່າ 3 ລ້ານຄົນ, ເມືອງທຸກຍາກທີ່ມີອັດຕາຄວາມທຸກຍາກສູງກວ່າ 18% ມີ 229 ເມືອງ, ບ້ານທຸກຍາກທີ່ມີອັດຕາຄວາມທຸກຍາກສູງກວ່າ 20% ມີ 2 ໝື່ນ 9 ພັນ 800 ບ້ານ. ປີ 2018, ຈີນຍັງຈະຫຼຸດຜ່ອນຄວາມທຸກຍາກຫຼາຍກວ່າ 10 ລ້ານຄົນ, ຍັງຈະມີເມືອງທຸກຍາກ ປະມານ 100 ເມືອງຫຼຸດພົ້ນອອກຈາກຄວາມທຸກຍາກ.
 |
