ວັນທີ 17 ກຸມພານີ້,ກົມທ່ອງທ່ຽວແຫ່ງຊາດຈີນແຈ້ງໃຫ້ຮູ້ວ່າ, ໃນ 3 ວັນທຳອິດຂອງບຸນກຸດຈີນປີນີ້ ຈີນໄດ້ຮັບຕ້ອນນັກທ່ອງທ່ຽວລວມ 214 ລ້ານເທື່ອຄົນ, ເພີ່ມຂຶ້ນຫຼາຍກວ່າເວລາດຽວກັນຂອງປີກາຍ 9.7%, ໄດ້ລາຍຮັບຫຼາຍກວ່າ 258 ຕື້ 200 ລ້ານຢວນ, ເພີ່ມຂຶ້ນຫຼາຍກວ່າເວລາດຽວກັນຂອງປີກາຍ 9.9%.
ກົມການທ່ອງທ່ຽວແຫ່ງຊາດຈີນກ່າວວ່າ, ເມື່ອລວມສູນສະຖິຕິທຸກຝ່າຍແລ້ວ,ສູນຕົວເລກຂໍ້ມູນຂ່າວສານຂອງກົມທ່ອງທ່ຽວແຫ່ງຊາດສະຫຼຸບວ່າ, ໃນວັນທີ 17 ກຸມພານີ້ ທົ່ວປະເທດໄດ້ຮັບຕ້ອນນັກທ່ອງທ່ຽວ 87 ລ້ານເທື່ອຄົນ, ເພີ່ມຂຶ້ນຫຼາຍກວ່າເວລາດຽວກັນຂອງປີກາຍ 10.6%, ລາຍຮັບດ້ານການທ່ອງທ່ຽວບັນລຸ 110 ຕື້ 700 ລ້ານຢວນ, ເພີ່ມຂຶ້ນຫຼາຍກວ່າເວລາດຽວກັນຂອງປີກາຍ 10.7%.
ກົມການທ່ອງທ່ຽວແຫ່ງຊາດຍັງເຜີຍໃຫ້ຮູ້ວ່າ, ມື້ດຽວກັນ ທາງລົດໄຟທົ່ວປະເທດຈີນຄາດວ່າໄດ້ສົ່ງຜູ້ໂດຍສານ 6 ລ້ານ 8 ແສນ 9 ໝື່ນເທື່ອຄົນ, ຫຼາຍກວ່າເວລາດຽວກັນຂອງປີຜ່ານມາ 80%. ການບັນເທີງລື້ນເລິງໃນຕົວເມືອງກໍຄຶກຄື້ນຫຼາຍ, ບຸນວັດ,ການຊົມຮູບເງົາ ແລະລາຍການວັດທະນະທຳອື່ນໆໄດ້ຮັບຄວາມນີຍົມຊົມຊອບຈາກປະຊາຊົນ, ນັບມາຮອດເວລາ 4 ໂມງແລງມື້ດຽວກັນ, ຈຳນວນລາຍໄດ້ຈາກການຂາຍປີ້ຊົມຮູງເງົາໃນທົ່ວປະເທດບັນລຸ 814 ລ້ານຢວນ.
ມື້ດຽວກັນ, ແຂວງຕ່າງໆຄື ເສສວນ, ກວາງຕຸ້ງ, ຈ່ຽງຊູ່, ຫູໜານ, ເຫີໜານ, ອ່ານຫຸ່ຍ, ຊ່ານຕົ່ງ, ຫູເປ, ກວາງຊີ,ແລະເຈີຈ່ຽງເປັນ 10 ແຂວງທີ່ໄດ້ຕ້ອນຮັບນັກທ່ອງທ່ຽວຫຼາຍທີ່ສຸດຂອງທົ່ວປະເທດ, ເຊິ່ງໄດ້ຕ້ອນຮັບນັກທ່ອງທ່ຽວທົ່ວປະເທດ 63.75%.