ໜັງສືພິມວຽງຈັນທາມລາຍງານວ່າ, ເມື່ອບໍ່ດົນມານີ້, ທ່ານນາງ ລາລີ ນັນທະວົງ ເຈົ້າໜ້າທີ່ອາວຸໂສພະແນກຖະແຫຼງຂ່າວ ວັດທະນະທຳແລະທ່ອງທ່ຽວນະຄອນຫຼວງວຽງຈັນຢືນຢັນວ່າ: ອົງການປົກຄອງນະຄອນຫຼວງວຽງຈັນຈະສຶກສາຄົ້ນຄວ້າການພັດທະນາສະຖານທີ່ທ່ອງທ່ຽວດອນຈັນ ແລະຄາດວ່າຈະເລີ່ມປະຕິບັດໂຄງການພັດທະນາທ່ອງທ່ຽວດັ່ງກ່າວໃນທ້າຍປີນີ້.
ຕາມແຜນການ, ອົງການປົກຄອງນະຄອນຫຼວງວຽງຈັນຈະພັດທະນາເຂດໃຕ້ຂອງດອນຈັນໃຫ້ເປັນສະຖານທີ່ທ່ອງທ່ຽວແຫ່ງໃໝ່ເພື່ອພັດທະນາຂະແໜງການທ່ອງທ່ຽວໂດຍເນັ້ນເອກະລັກພິເສດດ້ານຜະລິດຕະພັນອິນຊີ ເພື່ອເຮັດໃຫ້ໂຮງແຮມດອນຈັນເຂດເມືອງສີສັດຕະນາກແລະ ບໍລິເວນສວນສາທາສະນະເຈົ້າອະນຸວົງສາມາດດຶງດູດນັກທ່ອງທ່ຽວໃຫ້ຫຼາຍຂຶ້ນກວ່າເກົ່າເພື່ອສ້າງລາຍຮັບໃຫ້ແກ່ກະສິກອນທ້ອງຖິ່ນດັ່ງກ່າວ.
ເດືອນມັງກອນຜ່ານມາ, ທ່ານສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນໄດ້ຕົກລົງສ້າງຕັ້ງຄະນະກຳມະການປະສົມຫຼາຍຂະແໜງການເພື່ອຮັບຜິດຊອບໂຄງການດັ່ງກ່າວ ແລະຄະນະກຳມະການຈະປະຕິບັດການສຳຫຼວດໂຄງການແລະຈັດສັນເອົາຊາວກະສິກອນຜູ້ທີ່ມີເຈດຈຳນົງເຂົ້າຮ່ວມໂຄງການນັ້ນເປັນເປົ້າໝາຍການພັດທະນາ.