ໃນພິທີຖະແຫຼງຂ່າວຂອງກະຊວງກະສິກຳຈີນທີ່ຈັດຂຶ້ນ ຢູ່ນະຄອນຫຼວງປັກກິ່ງໃນວັນທີ 23 ກຸມພານີ້, ທ່ານເຈິ່ງຢຽນເຕີ ຫົວໜ້າກົມຄຸ້ມຄອງການປູກຝັງກະຊວງກະສິກຳຈີນເປີດເຜີຍວ່າ: ຈີນຈະເປີດກວ້າງຈຸດສຸມອະນຸລັກເນື້ອທີ່ດິນປູກຝັງໂດຍສັບປ່ຽນການປູກ ຫຼືເຊົາປູກຝັງຕື່ມອີກ, ເນື້ອທີ່ຈຸດສຸມຂອງປີ 2018 ນີ້ຈະເພີ່ມຂຶ້ນ 1 ເທົ່າເມື່ອທຽບໃສ່ປີ 2017 ຜ່ານມາ, ຈາກນັ້ນ ແຕ່ລະປີຈະເພີ່ມຂຶ້ນຕາມອັດຕາທີ່ແນ່ນອນ ເພື່ອສູ້ຊົນເຮັດໃຫ້ເພີ່ມຂຶ້ນຮອດ 3 ລ້ານ 3 ແສນ 3 ໝື່ນເຮັກຕາຂຶ້ນໄປ.
ທ່ານເຈິ່ງຢຽນເຕີຢືນຢັນວ່າ: ແຕ່ກ່ອນ, ເພື່ອຮັບປະກັນການເພີ່ມປະລິມານການປູກຝັງ,ການສະໜອງທັນຍາຫານແລະແກ້ໄຂບັນຫາການບໍລິໂພກຂອງປະຊາຊົນ, ຈິ່ງໄດ້ບຸກເບີກເນື້ອທີ່ປູກຝັງຫຼາຍເກີນໄປ,ຊັບພະຍາກອນນ້ຳ ສິ້ນເປືອງເກີນໄປພ້ອມທັງນຳໃຊ້ປຸຍເຄມີແລະຢາປາບສັດຕູພືດຫຼາຍເກີນໄປ ຈຶ່ງສົ່ງຜົນເຮັດໃຫ້ລະບົບນິເວດກະສິກຳຖືກທຳລາຍຢ່າງໜັກໜ່ວງ. ປັດຈຸບັນ, ຕ້ອງປ່ຽນແປງວິທີການຜະລິດແບບຊະຊາຍຢ່າງຮີບດ່ວນ, ແກ້ໄຂບັນຫາການນຳໃຊ້ຊັບພະຍາກອນຫຼາຍເກີນໄປແລະສະກັດກັ້ນການຊຸດໂຊມລົງຂອງລະບົບນິເວດ.
ປີ 2016, ພາຍໃຕ້ການສົ່ງເສີມຮ່ວມຂອງ 10 ຂະແໜງການເຊັ່ນກະຊວງກະສິກຳ,ກະຊວງການເງິນແລະອື່ນໆ, ຈີນເລີ່ມປະຕິບັດລະບຽບການສັບປ່ຽນການປູກ ແລະເຊົາປູກຝັງຕາມເນື້ອທີ່ປູກຝັງຈຸດສຸມ, ປີ 2016, ເນື້ອທີ່ປູກຝັງຈຸດສຸມດັ່ງກ່າວບັນລຸ 4 ແສນ 1 ໝື່ນເຮັກຕາ, ປີ 2017 ໄດ້ເພີ່ມຂຶ້ນເຖິງ 8 ແສນເຮັກຕາ.
 |
