ສື່ມວນຊົນຟີລິບປິນລາຍງານໃນວັນທີ 23 ກຸມພານີ້ວ່າ: ເມື່ອບໍ່ດົນມານີ້, ທ່ານໂຣດຣີໂກ ດູເຕີເຕ ປະທານາທິບໍດີຟີລິບປິນຢືນຢັນວ່າ ໃນໄລຍະການດຳລົງຕຳແໜ່ງຂອງຕົນຈະບໍ່ອະນຸຍາດໃຫ້ກອງທັບຟີລິບປິນເຂົ້າຮ່ວມສົງຄາມນອກປະເທດທີ່ນຳໂດຍອາເມລິກາຢ່າງເດັດຂາດ.
ກ່ອນໜ້ານີ້, ຟີລິບປິນແລະອາເມລິກາໄດ້ເຊັນສັນຍາການທະຫານ ແລະຟີລິບປິນກໍໄດ້ສົ່ງທະຫານຫຼືໜ່ວຍກູ້ໄພແບບມະນຸດສະທຳໄປເຂົ້າຮ່ວມສົງຄາມນອກປະເທດທີ່ນຳໂດຍອາເມລິກາມາຫຼາຍຄັ້ງແລ້ວ, ນອກນີ້, ກອງທະຫານອາເມລິກາຍັງມີສິດນຳໃຊ້ຖານທັບ 5 ແຫ່ງຢູ່ຟີລິບປິນ. ແຕ່ວ່າ ນັບຕັ້ງແຕ່ ຂຶ້ນດຳລົງຕຳແໜ່ງເປັນປະທານາທິບໍດີຟີລິບປິນເປັນຕົ້ນມາ, ທ່ານດູເຕີເຕກໍໄດ້ຢືນຢັນມາຫຼາຍເທື່ອແລ້ວວ່າ ຈະຢຸດເຊົາການຮ່ວມມືດ້ານການທະຫານລະຫວ່າງຟີລິບປິນກັບອາເມລິກາ ຂະນະດຽວກັນ, ຂະໜາດການຊ້ອມຮົມຮ່ວມລະຫວ່າງສອງປະເທດກໍໄດ້ຫຼຸດໜ້ອຍລົງເຊັ່ນກັນ.
 |
