ສະຖານກົງສຸນໃຫຍ່ ສປປ ລາວປະຈຳນານນິງ, ສູນແລກປ່ຽນວັດທະນະທຳສາກົນກວາງຊີ ແລະຫໍພິພິດທະພັນນານນິງຮ່ວມກັນເປັນເຈົ້າພາບໄດ້ຈັດ ການສຳມະນາວັດທະນະທຳຈີນ-ລາວຂອບ "ໜຶ່ງແລວທາງໜຶ່ງເສັ້ນທາງ" ຂຶ້ນຢູ່ຫໍພິພິດທະພັນນານນິງ ເຂດປົກຄອງຕົນເອງເຜົ່າຈ້ວງກວາງຊີ ສປ ຈີນໃນຕອນເຊົ້າວັນທີ 24 ກຸມພານີ້.
ທ້າຍເດືອນມັງກອນຜ່ານມາ, ການແຂ່ງຂັນນະວັດຕະກຳຊາວໜຸ່ມກ່ຽວກັບການພັດທະນາແລະປົກຄອງແຫ່ງພາກພື້ນແມ່ນ້ຳລ້ານຊ້າງ-ແມ່ນ້ຳຂອງໄດ້ຈັດຂຶ້ນຢູ່ມະຫາວິທະຍາໄລແຫ່ງຊາດລາວເປັນຄັ້ງທຳອິດແລະໄດ້ປະສົບຜົນສຳເລັດຢ່າງຈົບງາມ.ຄະນະຜູ້ແທນແລກປ່ຽນວັດທະນະທຳແມ່ນ້ຳລ້ານຊ້າງ-ແມ່ນ້ຳຂອງກວາງຊີ ສປ ຈີນໄດ້ຢ້ຽມຢາມມະຫາວິທະຍາໄລແຫ່ງຊາດລາວ,ຫໍພິພິດທະພັນແຫ່ງຊາດລາວ, ກົມຮູບເງົາລາວແລະອົງການອື່ນໆທັງໄດ້ເຊື້ອເຊີນພະນັກງານຫໍພິພິດທະພັນແຫ່ງຊາດລາວໄປແລກປ່ຽນຮ່ວມມືຢູ່ນະຄອນນານນິງ, ຮ່ວມມືກັບກົມຮູບເງົາລາວໃນການກະກຽມຖ່າຍທຳຟີມສາລະຄະດີ "ໂຮງຮຽນຫົກສິບເຈັດ" ແລະເພີ່ມທະວີການແລກປ່ຽນແລະຖອດຖອນບົດຮຽນເຊິ່ງກັນແລະກັນໃນດ້ານພັດທະນາຂະແໜງການທ່ອງທ່ຽວລະຫວ່າງສອງຝ່າຍໂດຍມີທ່ານນາງວັນສີ ວິລິຍະພອນ ກົງສຸນໃຫຍ່ ສປປ ລາວປະຈຳນານນິງຮ່ວມເດີນທາງ.
ທ່ານນາງ ວັນສີ ວິລິຍະພອນ ຢືນຢັນວ່າ ໂຄງການແລກປ່ຽນວັດທະນະທຳແລະການຮ່ວມມືເຫຼົ່ານີ້ບໍ່ພຽງແຕ່ໄດ້ປະກອບສ່ວນຢ່າງຫຼວງຫຼາຍເຂົ້າໃນການສົ່ງເສີມສາຍພົວພັນມິດຕະພາບລາວ-ຈີນເທົ່ານັ້ນ,ຍັງຈະເສີມຂະຫຍາຍການຮ່ວມມືລະຫວ່າງສອງປະເທດໃນຂົງເຂດຕ່າງໆເປັນຕົ້ນເສດຖະກິດການຄ້າ, ການທ່ອງທ່ຽວ ແລະອື່ນໆອີກດ້ວຍ. ປັດຈຸບັນ, ການຮ່ວມມືລາວ-ຈີນກຳລັງໄດ້ຮັບໂອກາດໃນການຮ່ວມມືທີ່ດີທີ່ສຸດ ແລະສະຖານກົງສຸນໃຫຍ່ລາວປະຈຳນານນິງກໍຈະຕັ້ງໜ້າເສີມຂະຫຍາຍບົດບາດການພົວພັນແລະປະສານງານເພື່ອພະຍາຍາມສະໜັບສະໜູນແລະຊ່ວຍຈັດຕັ້ງປະຕິບັດໂຄງການດັ່ງກ່າວໃຫ້ເປັນຮູບປະທຳ.
