ວັນທີ 25 ກຸມພານີ້, ໂຄສົກກະຊວງການຕ່າງປະເທດສປປ ເກົາຫຼີໄດ້ປະນາມອາເມລິກາທີ່ປະກາດໃຊ້ມາດຕະການຂວ້ຳບາດຮອບໃໝ່ຕໍ່ປະເທດຕົນວ່າ ມາດຕະການດັ່ງກ່າວຂອງອາເມລິກາມີເຈຕະນາເຮັດໃຫ້ແຫຼມເກົາຫຼີເກີດການເປັນປໍລະປັກແລະສົງຄາມອີກຄັ້ງໃໝ່.
ຂ່າວສານສູນກາງ ສປປ ເກົາຫຼີໄດ້ລາຍງານໂດຍອ້າງຕາມຄຳຖະແຫຼງຂອງໂຄສົກກະຊວງການຕ່າງປະເທດສປປ ເກົາຫຼີວ່າ: ປັດຈຸບັນ, ສະພາບການເຈລະຈາແລະຮ່ວມມືລະຫວ່າງສອງເກົາຫຼີເກີດຂຶ້ນໄດ້ນັ້ນມັນບໍ່ແມ່ນເລື່ອງງ່າຍປານໃດ, ຈາກຄວາມພະຍາຍາມຮ່ວມຂອງສອງຝ່າຍ, ງານມະຫາກຳກິລາໂອລິມປິກລະດູໜາວພຽງຊາງໄດ້ຈັດຂຶ້ນແລະອັດລົງຢ່າງສຳເລັດຜົນ. ແຕ່ອາເມລິກາພັດໃຊ້ມາດຕະການຂວ້ຳບາດສປປເກົາຫຼີຢ່າງຫຼວງຫຼາຍກ່ອນງານມະຫາກຳກິລາໂອລິມປິກລະດູໜາວປິດລົງໂດຍມີເຈຕະນາເຮັດໃຫ້ແຫຼມເກົາຫຼີເກີດການເປັນປໍລະປັກແລະສົງຄາມອີກຄັ້ງໃໝ່.
ໂຄສົກກະຊວງການຕ່າງປະເທດສປປ ເກົາຫຼີກ່າວວ່າ: ສປປ ເກົາຫຼີໄດ້ຊີ້ແຈງມາຫຼາຍເທື່ອແລ້ວວ່າ ມາດຕະການປິດລ້ອມໃດໆກໍຕາມ, ສປປ ເກົາຫຼີລ້ວນແຕ່ຈະຖືວ່າເປັນການກະທຳແບບກໍ່ສົງຄາມ.ຖ້າຫາກອາເມລິກາຂືນແຕະຕ້ອງແລະທ້າທາຍເກາະຜິດໂດຍບໍ່ຫົວຊາຕໍ່ຄວາມຈິງໃຈແລະຄວາມພະຍາຍາມຂອງສປປເກົາຫຼີເພື່ອປັບປຸງສາຍພົວພັນລະຫວ່າງສອງເກົາຫຼີໃຫ້ດີຂຶ້ນ ແລະປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ, ສປປ ເກົາຫຼີກໍ່ຈະຕອບໂຕ້ອາເມລິກາດ້ວຍວິທີຂອງຕົນເຊັ່ນກັນ.
 |
