ລາວຈະຄົ້ນຄວ້າຄວາມເປັນໄປໄດ້ຂອງໂຄງການທາງດ່ວນວຽງຈັນ-ຈຳປາສັກ
2018-02-28 10:42:00 cri
ໜັງສືພິມວຽງຈັນທາມສະບັບວັນທີ 26 ກຸມພານີ້ລາຍງານວ່າ: ກະຊວງໂຍທາທິການແລະຂົນສົ່ງລາວເປີດເຜີຍວ່າ: ລັດຖະບານໄດ້ເລືອກເອົາ 4 ບໍລິສັດຂອງຈີນແລະລາວຄື ບໍລິສັດສາທາລະນະກໍ່ສ້າງແລະພັດທະນາໂພສີ, ກຸ່ມບໍລິສັດພັດທະນາດວງຈະເລີນລາວ,ບໍລິສັດຂົວທາງຢາງກວ່າງຢຸນນານຈີນແລະບໍລິສັດຂົວທາງຈີນເພື່ອດຳເນີນການສຶກສາຄົ້ນຄວ້າຄວາມເປັນໄປໄດ້ຂອງໂຄງການທາງດ່ວນວຽງຈັນ-ຈຳປາສັກ. ຫຼັງສຳເລັດວຽກງານດັ່ງກ່າວແລ້ວ, ລັດຖະບານລາວຈະອະນຸຍາດໃຫ້ບໍລິສັດເຫຼົ່ານີ້ລົງທຶນກໍ່ສ້າງໂຄງການດັ່ງກ່າວດ້ວຍຮູບແບບBOT. ທາງດ່ວນວຽງຈັນ-ຈຳປາສັກມີຄວາມຍາວທັງໝົດ 600 ກິໂລແມັດ ປະກອບດ້ວຍທາງແລ່ນລົດ ກວ້າງ 3,5 ແມັດ 4 ເລນ ແລະຄວາມກວ້າງຂອງທາງທັງໝົດລວມ 23 ແມັດ. ທາງດ່ວນສາຍນີ້ຈະກໍ່ສ້າງຕາມມາດຕະຖານທາງດ່ວນອາຊຽນ ຊັ້ນ 1. ເມື່ອສ້າງສຳເລັດແລ້ວ, ການເດີນທາງຈາກວຽງຈັນຫາຈຳປາສັກຈະໃຊ້ເວລາໜ້ອຍລົງຄືຈາກ 10 ຊົ່ວໂມງໃນໄລຍະຜ່ານມາຈະຫຼຸດລົງເຫຼືອພຽງ 7 ຊົ່ວໂມງເທົ່ານັ້ນ.
