ປຶ້ມ "ຄັດເລືອກບາງຕອນຂອງບົດລາຍງານກອງປະຊຸມໃຫຍ່ຜູ້ແທນພັກກອມມູນິດຈີນຄັ້ງທີ 19" (ສະບັບພາສາຈີນແລະອັງກິດ) ໄດ້ພິມຈຳໜ່າຍໂດຍສຳນັກພິມພາສາຕ່າງປະເທດຢູ່ພາຍໃນແລະຕ່າງປະເທດໃນຫວ່າງມໍ່ໆນີ້.
ໃນວັນທີ 18 ຕຸລາ 2017 ຜ່ານມາ, ທ່ານ ສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ໄດ້ຕາງໜ້າຄະນະກຳມະການສູນກາງຊຸດທີ 18 ຜ່ານບົດລາຍງານ "ສູ້ຊົນສ້າງສັງຄົມອີ່ມໜຳສຳລານໃນໄລຍະສຸດທ້າຍໃຫ້ສຳເລັດຢ່າງຮອບດ້ານ ຍາດເອົາໄຊຊະນະອັນຍິ່ງໃຫຍ່ແຫ່ງສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່" ໃນພິທີໄຂກອງປະຊຸມ ໂດຍໄດ້ຮັບການຕອບຮັບຢ່າງກວ້າງຂວາງຈາກພາຍໃນແລະຕ່າງປະເທດ. ເພື່ອຊ່ວຍຜູ້ອ່ານຢູ່ພາຍໃນແລະຕ່າງປະເທດສຶກສາຄົ້ນຄວ້າເນື້ອໃນສຳຄັນແລະຄວາມໝາຍອັນເລິກເຊິ່ງຂອງເອກະສານດັ່ງກ່າວ, ຄະນະໂຄສະນາອົບຮົມສູນກາງພັກກອມມູນິດຈີນ, ຫ້ອງການຖະແຫຼງຂ່າວລັດຖະບານຈີນ ໄດ້ຮ່ວມກັບສຳນັກຂ່າວສານຊິ່ນຮວາແລະອົງການພິມຈຳໜ່າຍພາສາຕ່າງປະເທດຂອງຈີນຮຽບຮຽງປຶ້ມດັ່ງກ່າວ. ເນື້ອໃນສຳຄັນຂອງປຶ້ມດັ່ງກ່າວຄັດເລືອກຈາກບົດລາຍງານຂອງກອງປະຊຸມໃຫຍ່ພັກກອມມູນິດຈີນຄັ້ງທີ 19 ແລະແບ່ງເປັນ 16 ພາກ ໂດຍໄດ້ສ່ອງແສງໃຫ້ເຫັນຢ່າງເຕັມສ່ວນເຖິງຜົນງານຄັ້ງປະຫວັດສາດ ແລະ ການປ່ຽນແປງຄັ້ງປະຫວັດສາດທີ່ເກີດຂຶ້ນໃນການປະຕິຮູບ, ໄຂປະຕູສູ່ໂລກພາຍນອກ ແລະການສ້າງສາສັງຄົມນິຍົມທັນສະໄໝຂອງຈີນນັບແຕ່ກອງປະຊຸມໃຫຍ່ພັກກອມມູນິດຈີນຄັ້ງທີ 18 ເປັນຕົ້ນມາ, ໄດ້ສ່ອງແສງໃຫ້ເຫັນຢ່າງເຕັມສ່ວນເຖິງແນວຄິດສຳຄັນ, ທັດສະນະສຳຄັນ, ຂໍ້ວິນິດໄສສຳຄັນ ແລະມາດຕະການສຳຄັນທີ່ສະເໜີໃນກອງປະຊຸມໃຫຍ່ພັກກອມມູນິດຈີນຄັ້ງທີ 19. ປຶ້ມດັ່ງກ່າວມີເນື້ອໃນກະທັດຮັດ, ມີອົງປະກອບຊັດເຈນ ແລະມີຄວາມໜ້າອ່ານຫຼາຍ, ມີຜົນດີຕໍ່ພະນັກງານແລະປະຊາຊົນຢ່າງໃຫຍ່ຫຼວງໃນການຄົ້ນຄວ້າຮ່ຳຮຽນແລະເຂົ້າໃຈຕໍ່ນ້ຳໃຈຂອງກອງປະຊຸມໃຫຍ່ຄັ້ງທີ 19 ຢ່າງເລິກເຊິ່ງ, ມີຜົນດີຕໍ່ປະຊາຄົມໂລກໃນການເຂົ້າໃຈທັດສະນະຄະຕິແຫ່ງການປົກຄອງປະເທດ, ຍຸດທະສາດແຫ່ງການບໍລິຫານການເມືອງຂອງພັກກອມມູນິດຈີນ ແລະຊອກຮູ້ເສັ້ນທາງພັດທະນາພ້ອມດ້ວຍນະໂຍບາຍຕໍ່ພາຍໃນແລະຕ່າງປະເທດຂອງຈີນໃນອະນາຄົດຕື່ມອີກ.
ຂ່າວແຈ້ງຕື່ມວ່າ, ປຶ້ມດັ່ງກ່າວສະບັບພາສາຝຣັ່ງ, ຣັດເຊຍ, ອາຣັບ, ແອສປາຍ, ປອກຕຸຍການ, ເຢຍລະມັນ, ຍີ່ປຸ່ນ ແລະອື່ນໆ ກໍຈະພິມຈຳໜ່າຍຢູ່ພາຍໃນແລະຕ່າງປະເທດໃນໄວໆນີ້ເຊັ່ນດຽວກັນ.
 |
