ວັນທີ 27 ກຸມພາແລ້ວນີ້, ຄະນະກຳມະການການຄ້າໄທ-ຈີນໄດ້ຈັດກອງປະຊຸມເວທີປຶກສາຫາລືວິໄສທັດສາຍພົວພັນຈີນ-ໄທ. ຜູ້ເຂົ້າຮ່ວມປະຊຸມມີຄວາມເຫັນເປັນເອກະພາບກັນ ວ່າ ປັດຈຸບັນ, ສອງປະເທດຈີນ-ໄທຕ່າງກໍໄດ້ເຂົ້າສູ່ໄລຍະສຳຄັນແຫ່ງການພັດທະນາປະເທດຕົນ ແລະການຂະຫຍາຍຕົວຂອງສາຍພົວພັນລະຫວ່າງສອງປະເທດກໍໄດ້ພົບໂອກາດສຳຄັນ.
ທ່ານຫຼີຈ້ຽນ ເອກອັກຄະລັດຖະທູດຈີນປະຈຳໄທປາໄສໃນກອງປະຊຸມວ່າ: ປັດຈຸບັນ, ໄທກຳລັງສ້າງຍຸດທະສາດພັດທະນາປະເທດໃນ 20 ປີຕໍ່ໜ້າໂດຍຊຸກຍູ້ການກໍ່ສ້າງອຸດສາຫະກຳຍຸກ4.0ຢ່າງຮອບດ້ານ ທັງໄດ້ສ້າງຮ່າງກົດໝາຍວ່າດ້ວຍແລວທາງເສດຖະກິດພາກຕາເວັນອອກ, ສ່ວນບໍລິສັດວິທະຍາສາດເຕັກໂນໂລຊີທີ່ກ້າວໜ້າທັນສະໄໝຫຼືໄຮເທັກຂອງຈີນເປັນຕົ້ນ ຫົວເຫວີຍ,ຈິ່ງຕຸ່ງ ແລະອາລີບາບາກໍໄດ້ລົງທຶນດຳເນີນທຸລະກິດຢູ່ໄທຕາມລຳດັບເພື່ອຮ່ວມກັບໄທແປ່ງບັນເຕັກນິກໃໝ່ແລະກ້າວໜ້າ, ຂະນະດຽວກັນ, ຕະຫຼາດອັນໃຫຍ່ຫຼວງຂອງຈີນກໍໄດ້ເປີດໂອກາດຢ່າງກວ້າງຂວາງໃຫ້ແກ່ການພັດທະນາຂອງໄທເຊັ່ນກັນ. ຈີນມີເຕັກນິກກ້າວໜ້າທັນສະໄໝແລະປະສົບການຢ່າງຫຼວງຫຼາຍໃນດ້ານເຕັກນິກໃໝ່ທີ່ກ້າວໜ້າເປັນຕົ້ນ ການທະນາຄານທາງອິນເຕີເນັດ,ຖານຂໍ້ມູນໃຫຍ່,ຫຸ່ນຍົນອຸດສາຫະກຳ, ລົດໃຊ້ພະລັງງານໄຟຟ້າ, ພະລັງງານໃໝ່ແລະອື່ນໆ.
ທ່ານວິກຣົມ ກຣົມມາດິດ ປະທານຄະນະກຳມະການການຄ້າໄທ-ຈີນໃຫ້ຮູ້ວ່າ: ຈີນມີຖານະສຳຄັນໃນດ້ານເສດຖະກິດການຄ້າຂອງໄທ, ເປັນຄູ່ຄ້າສຳຄັນຂອງໄທ ແລະນັກທ່ອງທ່ຽວຈີນກໍໄດ້ປະກອບສ່ວນສຳຄັນເຂົ້າໃນການການພັດທະນາເສດຖະກິດໂດຍລວມຂອງໄທເຊັ່ນກັນ. ໄທຕັ້ງໜ້າເຂົ້າຮ່ວມການສ້າງ "ໜຶ່ງແລວ ໜຶ່ງເສັ້ນທາງ", ຊຸກຍູ້ການເຮັດໃຫ້ຍຸດທະສາດອຸດສາຫະກຳຍຸກ 4.0, ແລວທາງເສດຖະກິດພາກຕາເວັນອອກຂອງໄທເຊື່ອມຕໍ່ກັບການສ້າງ"ໜຶ່ງແລວ ໜຶ່ງເສັ້ນທາງ",ເປີດກວ້າງການເຊື່ອມຍົງຜົນປະໂຫຍດຂອງສອງປະເທດ ເຊິ່ງຈະເຮັດໃຫ້ຈັງຫວະການພັດທະນາຂອງສອງປະເທດສ້າງຜົນປະໂຫຍດໃຫ້ແກ່ທັງສອງປະເທດເປັນຢ່າງດີ.
 |
