ຫວ່າງມໍ່ໆມານີ້, ທ່ານຮິເທັນ ຜູ້ບັນຊາການຂອງກອງບັນຊາການຍຸດທະສາດອາເມລິກາກ່າວວ່າ, ຈີນໄດ້ສ້າງການຂົ່ມຂູ່ພິເສດຕໍ່ປະເທດຕົນໃນຂົງເຂດອະວະກາດແລະກຳລັງສູ້ຮົບ. ທ່ານໂວເທີ ຜູ້ບັນຊາການຂອງກອງບັນຊາການສູນກາງອາເມລິກາກໍກ່າວວ່າ, ຈີນມີ "ຄວາມທະເຍີທະຍານທາງດ້ານການທະຫານນັບມື້ນັບຫຼາຍຂຶ້ນ" ຢູ່ເຂດຕາເວັນອອກກາງ. ໃນໂອກາດຕອບຄຳຖາມຂອງນັກຂ່າວໃນພິທີຖະແຫຼງຂ່າວທີ່ຈັດຂຶ້ນໃນວັນທີ 1 ມີນານີ້, ທ່ານນາງຮ້ວາຊຸ່ນຢິງ, ໂຄສົກກະຊວງການຕ່າງປະເທດຈີນກ່າວວ່າ, ອາເມລິກາໃນຖານະເປັນປະເທດທີ່ມີກຳລັງທະຫານເຂັ້ມແຂງທີ່ສຸດໃນໂລກ, ຄ່າໃຊ້ຈ່າຍໃນການທະຫານນຳໜ້າໂລກຢ່າງຫຼວງຫຼາຍ, ເຊິ່ງຫຼາຍກວ່າຍອດມູນຄ່າລາຍຈ່າຍການທະຫານອັນດັບທີ 2 ຮອດອັນດັບທີ 7 ບວກເຂົ້າກັນ, ເປັນຫຍັງຈຶ່ງຍັງເວົ້າວ່າປະເທດອື່ນມີການຂົ່ມຂູ່ຕໍ່ອາເມລິກາ. ຫວ່າງກ່ອນນີ້ບໍ່ດົນ, ເຈົ້າໜ້າທີ່ລະດັບສູງກະຊວງການຕ່າງປະເທດອາເມລິກາໄປປະເທດອາຊີເພື່ອຂາຍອາວຸດທັນສະໄໝເຊັ່ນຍົນຮົບ F-35, ຄົນທັງຫຼາຍກໍຕ້ອງຖາມວ່າ, ເຈດຕະນາແທ້ຈິງທີ່ອາເມລິກາເວົ້າວ່າປະເທດຕົນໄດ້ຮັບ "ການຂົ່ມຂູ່ຈາກຈີນ" ແມ່ນຫຍັງ?
ທ່ານນາງຮ້ວາຊຸ່ນຢິງ ກ່າວເນັ້ນຕື່ມວ່າ, ເຈດຕະນາຍຸດທະສາດຂອງຈີນແມ່ນໂປ່ງໃສທີ່ສຸດ, ເປົ້າໝາຍພື້ນຖານແຫ່ງການພັດທະນາຂອງຈີນແມ່ນເພື່ອສະແຫວງຫາຄວາມສຸກໃຫ້ແກ່ປະຊາຊົນ, ສະແຫວງຫາການຟື້ນຟູຄວາມຈະເລີນຮຸ່ງເຮືອງຂອງຊົນຊາດຄືນໃໝ່ແລະສະແຫວງຫາສັນຕິພາບແລະການພັດທະນາຂອງໂລກ. ທ່ານຮຽກຮ້ອງໃຫ້ອາເມລິກາຄວນປະຖິ້ມແນວຄິດສົງຄາມເຢັນທີ່ຫຼ້າສະໄໝ, ມີທັດສະນະພາວະວິໄສຕໍ່ການພັດທະນາຂອງຈີນກໍຄືໂລກປັດຈຸບັນ.