ກອງປະຊຸມເທື່ອທຳອິດຂອງສະພາປະຊາຊົນແຫ່ງຊາດຈີນສະໄໝທີ 13 ຈະຈັດຂຶ້ນຢູ່ທີ່ປັກກິ່ງເລີ່ມແຕ່ວັນທີ 5 ຫາວັນທີ 20 ມີນານີ້, ໃຊ້ເວລາດຳເນີນ 15 ມື້ເຄິ່ງ. ກອງປະຊຸມສະພາປະຊາຊົນແຫ່ງຊາດຈີນເທື່ອນີ້ແມ່ນກອງປະຊຸມທີ່ຍາວທີ່ສຸດແລະມີວາລະຫຼາຍທີ່ສຸດຕະຫຼອດຊຸມປີຜ່ານມານີ້.
ໃນກອງປະຊຸມຖະແຫຼງຂ່າວກ່ຽວກັບກອງປະຊຸມເທື່ອນີ້ທີ່ຈັດຂຶ້ນໃນຕອນເຊົ້າວັນທີ 4 ມີນານີ້, ທ່ານຈ່າງເຢ້ຊຸ້ຍ ໂຄສົກກອງປະຊຸມສະພາປະຊາຊົນແຫ່ງຊາດຈີນຜູ້ໃໝ່ແຈ້ງໃຫ້ຊາບວ່າ: ກອງປະຊຸມເທື່ອນີ້ທັງໝົດມີ 10 ວາລະ ເຊັ່ນ: ພິຈາລະນາບົດລາຍງານວຽກງານລັດຖະບານ, ພິຈາລະນາກວດກາບົດລາຍງານແຜນການແລະບົດລາຍງານງົບປະມານ, ພິຈາລະນາຮ່າງລັດຖະທຳມະນູນສະບັບດັດແກ້ແລະຮ່າງກົດໝາຍວ່າດ້ວຍການຕິດຕາມກວດກາ, ພິຈາລະນາບົດລາຍງານວຽກງານຄະນະກຳມະການປະຈຳສະພາປະຊາຊົນແຫ່ງຊາດຈີນ ບົດລາຍງານວຽກງານສານປະຊາຊົນສູງສຸດ ແລະບົດລາຍງານວຽກງານຂອງໄອຍະການປະຊາຊົນສູງສຸດ, ພິຈາລະນາແຜນການປະຕິຮູບອົງການລັດຖະບານ, ເລືອກຕັ້ງແລະຕົກລົງຮັບເອົາສະມາຊິກພາກສ່ວນຕ່າງໆຂອງລັດ ແລະອື່ນໆ.
ຕາມຂ່າວແຈ້ງໃຫ້ຮູ້ວ່າ: ໃນໄລຍະກອງປະຊຸມ, ຈະຈັດກອງປະຊຸມຂ່າວ 14 ເທື່ອໂດຍໝູນອ້ອມບັນຫາຕ່າງໆເຊັ່ນ ການດັດແກ້ລັດຖະທຳມະນູນ, ວຽກງານນິຕິບັນຍັດແລະຕິດຕາມກວດກາຂອງສະພາປະຊາຊົນແຫ່ງຊາດຈີນ ພ້ອມທັງບັນຫາຈຸດສຸມໃນການພັດທະນາຂອງເສດຖະກິດສັງຄົມ. ພາຍຫຼັງປິດກອງປະຊຸມ ໃນຕອນເຊົ້າວັນທີ 20 ມີນາ, ນາຍົກລັດຖະມົນຕີຊຸດໃໝ່ຈະຕ້ອນຮັບການເຂົ້າພົບຂອງນັກຂ່າວຈີນແລະຕ່າງປະເທດແລະຕອບຄຳຖາມ. ກອງປະຊຸມເທື່ອນີ້ນອກຈາກໄດ້ຈັດໃຫ້ມີຊ່ອງທາງລັດຖະມົນຕີແລ້ວ, ຍັງໄດ້ຈັດຕັ້ງການສຳພາດແບບໂຮມສູນຢູ່ຊ່ອງທາງຜູ້ແທນເປັນຄັ້ງທຳອິດ, ເພື່ອຕອບສະໜອງຄຳຕອບທີ່ເປັນທີ່ຄວາມສົນໃຈຂອງຄົນທັງຫຼາຍ.
 |
