ຕາມຂ່າວCRI：ວັນທີ 3 ມີນານີ້, ກອງປະຊຸມຄັ້ງທຳອິດຂອງຄະນະກຳມະການທົ່ວປະເທດສະພາປຶກສາການເມືອງປະຊາຊົນແຫ່ງຊາດຈີນສະໄໝທີ 13 ໄດ້ໄຂຂຶ້ນຢູ່ນະຄອນຫຼວງປັກກິ່ງ. ທ່ານສີຈິ້ນຜິງພ້ອມດ້ວຍຜູ້ນຳພັກແລະລັດຂອງຈີນໄດ້ເຂົ້າຮ່ວມກອງປະຊຸມ.
ທ່ານຢີຈື້ງເສິງໄດ້ຕາງໜ້າຄະນະປະຈຳສະພາປຶກສາການເມືອງປະຊາຊົນແຫ່ງຊາດຈີນສະໄໝທີ 12 ສະເໜີບົດລາຍງານວຽກງານຕໍ່ກອງປະຊຸມໃຫຍ່, ໄດ້ຫວນຄືນເຖິງຜົນສຳເລັດທີ່ໄດ້ຮັບດ້ານວຽກງານຂອງສະພາປຶກສາການເມືອງປະຊາຊົນແຫ່ງຊາດຈີນໃນ 5 ປີຜ່ານມານີ້, ແລະໄດ້ໃຫ້ຂໍ້ສະເໜີກ່ຽວກັບວຽກງານຂອງສະພາປຶກສາການເມືອງປະຊາຊົນແຫ່ງຊາດຈີນໃນ 5 ປີ ຕໍ່ໜ້ານີ້. ທ່ານຢີຈື້ງເສິງກ່າວວ່າ, ໃນ 5 ປີຜ່ານມານີ້, ສະພາປຶກສາການເມືອງປະຊາຊົນແຫ່ງຊາດຈີນໄດ້ປັບປຸງສະຖານະພາບດ້ານການປຶກສາຫາລືກ່ຽວກັບການເມືອງໃຫ້ສົມບູນກວ່າເກົ່າ, ເພີ່ມທະວີບົດບາດດ້ານການຕິດຕາມກວດກາປະຊາທິປະໄຕ, ບຸກເບີກວຽກງານການສ້າງຄວາມມິດຕະພາບແລະຄວາມສາມັກຄີກັນ, ເພີ່ມທະວີການສ້າງສາດ້ານຄວາມສາມາດຂອງການປະຕິບັດໜ້າທີ່. ສະພາປຶກສາການເມືອງປະຊາຊົນແຫ່ງຊາດຈີນສະໄໝໃໝ່ຕ້ອງລົງເລິກຮ່ຳຮຽນແລະປະຕິບັດແນວຄວາມຄິດສັງຄົມນິຍົມທີ່ມີສີສັນພິເສດຂອງຈີນສະໄໝໃໝ່ຂອງທ່ານສີຈິ້ນຜິງ, ສຸມໃສ່ການເອົາຊະນະໃນການກໍ່ສ້າງສັງຄົມແບບອີ່ມໜຳສຳລານໃຫ້ສຳເລັດຜົນຢ່າງຮອບດ້ານ, ໃຫ້ຂໍ້ສະເໜີແລະທຳຄວາມພະຍາຍາມເພື່ອບັນຫາທີ່ສຳຄັນຂອງການເລີ່ມຂະບວນວິວັດໃໝ່ຂອງການກໍ່ສ້າງສັງຄົມນິຍົມແບບທັນສະໄໝຢ່າງຮອບດ້ານ, ເຮັດໃຫ້ການປຶກສາຫາລືແລະປະຊາທິປະໄຕຖືກປະຕິບັດໃນຂະບວນການທັງໝົດຂອງການປຶກສາຫາລືດ້ານການເມືອງ, ການຕິດຕາມກວດກາປະຊາທິປະໄຕ, ການເຂົ້າຮ່ວມວຽກງານການເມືອງແລະປຶກສາຫາລືກ່ຽວກັບວຽກງານການເມືອງ, ເຕົ້າໂຮມພະລັງງານທາງບວກທີ່ເຮັດໃຫ້ຊົນຊາດຈີນມີຄວາມຈະເລີນຮຸ່ງເຮືອງແບບຍິ່ງໃຫຍ່ໃຫ້ຂະຫຍາຍອອກຢ່າງກວ້າງຂວາງ, ເພີ່ມທະວີສະຕິຕໍ່ພາລະໜ້າທີ່ຂອງກຳມະການ, ເພີ່ມທະວີຄວາມສາມາດຂອງການປະຕິບັດໜ້າທີ່ຢ່າງຮອບດ້ານ.
ກອງປະຊຸມຄັ້ງນີ້ນອກຈາກສຳຫຼວດພິຈາລະນາບົດລາຍງານວຽກງານ, ບົດລາຍງານກ່ຽວກັບສະພາບການວຽກງານຂອງຂໍ້ສະເໜີຂອງຄະນະປະຈຳສະພາປຶກສາການເມືອງປະຊາຊົນແຫ່ງຊາດຈີນແລະຄະຕິດັດແກ້ຂອງກົດບັນຍັດຂອງສະພາປຶກສາການເມືອງປະຊາຊົນແຫ່ງຊາດຈີນ, ຍັງຈະເລືອກຕັ້ງຜູ້ນຳຊຸດໃໝ່ຂອງສະພາປຶກສາການເມືອງປະຊາຊົນແຫ່ງຊາດຈີນ. ກຳມະການຂອງສະພາປຶກສາການເມືອງປະຊາຊົນແຫ່ງຊາດຈີນຍັງຈະເຂົ້າຮ່ວມກອງປະຊຸມທີ່ກ່ຽວຂ້ອງຂອງກອງປະຊຸມຄັ້ງທຳອິດສະພາປະຊາຊົນແຫ່ງຊາດຈີນສະໄໝທີ 13, ເພື່ອຮັບຟັງແລະປຶກສາຫາລືບົດລາຍງານວຽກງານຂອງລັດຖະບານ,ຮ່າງລັດຖະທຳມະນູນສະບັບດັດແກ້ແລະອື່ນໆ.
