ຕາມຂ່າວ CRI: ກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນຄັ້ງທຳອິດຊຸດທີ 13 ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 3 ມີນານີ້, ກອງປະຊຸມຄັ້ງທຳອິດຂອງສະພາປະຊາຊົນແຫ່ງຊາດຈີນຊຸດທີ 13 ໄຂຂຶ້ນຢູ່ນະຄອນຫຼວງປັກກິ່ງໃນວັນທີ 5 ມີນານີ້. ບັນຫາເສດຖະກິດ, ການພັດທະນາວິທະຍາສາດເຕັກນິກແລະຊີວິດການເປັນຢູ່ຂອງປະຊາຊົນຈີນໃນຊຸມປີຜ່ານມາໄດ້ກາຍເປັນຈຸດສຳຄັນທີ່ສື່ມວນຊົນອິນໂດເນເຊຍໄດ້ໃຫ້ຄວາມສົນໃຈແລະລາຍງານຂ່າວເປັນປະຈຳ.
ຂ່າວສານອັນທະຣາເຊິ່ງເປັນຂ່າວສານແຫ່ງຊາດອິນໂດເນເຊຍໄດ້ສົນໃຈຢ່າງສູງຕໍ່ເນື້ອໃນກ່ຽວກັບ GDP ຂອງຈີນໃນປີ 2017 ໄດ້ເພີ່ມຂຶ້ນ 6,9% ໃນບົດລາຍງານວຽກງານຂອງລັດຖະບານທີ່ສະເໜີໂດຍທ່ານຫຼີເຄີ້ສຽງ ນາຍົກລັດຖະມົນຕີຈີນ. ນອກນີ້, ຂ່າວສານອັນທະຣາຍັງໄດ້ລາຍງານກ່ຽວກັບຍັດຕິແລະຂໍ້ສະເໜີຈຳນວນໜຶ່ງທີ່ສະເໜີໂດຍຄະນະຜູ້ແທນຂອງກອງປະຊຸມສອງສະພາ, ລວມທັງນະໂຍບາຍປະຊາກອນຂອງຈີນແລະອື່ນໆ.
ໜັງສືພິມໂກວຈີ້ຢື້ປ້າວເຊິ່ງເປັນໜັງສືພິມພາສາຈີນໃຫຍ່ທີ່ສຸດຂອງອິນໂດເນເຊຍເຫັນວ່າ, ກອງປະຊຸມສອງສະພາປີນີ້ແມ່ນຈັດຂຶ້ນຫຼັງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19, ຈະອອກມາດຕະການປະຕິຮູບຕ່າງໆຢ່າງແນ່ນອນ, ໂດຍສະເພາະແມ່ນມາດຕະການທີ່ຮັບມືກັບສະຖານະການເສດຖະກິດໃໝ່ຂອງໂລກ. ໃນຖານະເປັນກຸ່ມເສດຖະກິດໃຫຍ່ອັນດັບທີສອງໃນໂລກ, ຂໍ້ຕົກລົງຂອງຈີນຈະມີຜົນສະທ້ອນໃນທາງທີດີຢ່າງໃຫຍ່ຫຼວງແລະເປັນໜ້າຕິດຕາມຢ່າງໃກ້ຊິດເປັນຢ່າງຍິ່ງ.
 |
