ທ່ານຮວງໂສຮົງ ຜູ້ຮັບຜິດຊອບໜ່ວຍງານຮ່າງ "ບົດລາຍງານວຽກງານລັດຖະບານ" ຈີນ, ຫົວໜ້າຫ້ອງການຄົ້ນຄວ້າຄະນະລັດຖະບານຈີນເປີດເຜີຍຢູ່ປັກກິ່ງໃນວັນທີ 5 ມີນານີ້ວ່າ, ຈີນໄດ້ຕັ້ງຄາດໝາຍການເຕີບໂຕເສດຖະກິດໃນປີ 2018 ປະມານ 6,5% ເຊິ່ງໄດ້ສ່ອງແສງໃຫ້ເຫັນເຖິງຄວາມຮຽກຮ້ອງໃຫ້ມີການພັດທະນາຄຸນນະພາບສູງ.
ທ່ານຮວງໂສຮົງກ່າວຕື່ມວ່າ, ການຕັ້ງຄາດໝາຍເສດຖະກິດໃນປີນີ້ລ້ວນແຕ່ໄດ້ສ່ອງແສງໃຫ້ເຫັນເຖິງຄວາມຮຽກຮ້ອງໃຫ້ມີການພັດທະນາຄຸນນະພາບສູງ ແລະ ປັດຈຸບັນ, ຄວາມສ່ຽງດ້ານການທະນາຄານຂອງຈີນສາມາດຄວບຄຸມໄວ້ໂດຍລວມ, ໜີ້ສິນລັດຖະບານ ແລະ ອຳນາດການປົກຄອງທ້ອງຖິ່ນແມ່ນ 1 ໝື່ນ 3 ພັນຕື້ຢວນ ແລະ 1 ໝື່ນ 6 ພັນຕື້ຢວນຕາມລຳດັບ.
ທ່ານຮວງໂສຮົງລາຍງານຕື່ມວ່າ, ທີ່ຈິງແລ້ວ, ມີອຳນາດການປົກຄອງທ້ອງຖິ່ນບາງແຫ່ງມີໜີ້ສິນແບບຜິດກົດໝາຍກົດບັນຍັດ ດ້ວຍການໃຫ້ຄຳໝັ້ນສັນຍາຈະໃຊ້ໜີ້ດ້ວຍງົບປະມານການເງິນ ຫຼືແບບຄ້ຳປະກັນ ເຊິ່ງເປັນຄວາມສ່ຽງທີ່ແຝງຊ້ອນຢູ່. ທ່ານກ່າວເນັ້ນວ່າ, ຕໍ່ໄປພາຍໜ້າ, ຈີນຈະສະກັດກັ້ນບໍ່ໃຫ້ໜີ້ສິນຂອງອຳນາດການປົກຄອງທ້ອງຖິ່ນເພີ່ມຂຶ້ນ ແລະ ແກ້ໄຂບັນຫາໜີ້ສິນທີ່ມີຢູ່ໃນປັດຈຸບັນຢ່າງເໝາະສົມ.
 |
