ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດ ໄດ້ອອກຖະແຫຼງການໂດຍຜ່ານໂຄສົກ ໃນວັນທີ 6 ມີນານີ້ ໂດຍສະແດງຄວາມຊົມເຊີຍຕໍ່ການເຈລະຈາລະຫວ່າງ ສປປ ເກົາຫຼີ ແລະ ສ.ເກົາຫຼີ ທີ່ໄດ້ຮັບຄວາມຄືບໜ້າຢ່າງຕັ້ງໜ້າ ແລະກ່າວຢ້ຳວ່າ ອົງການສະຫະປະຊາຊາດສືບຕໍ່ຄຳໝັ້ນສັນຍາຂອງຕົນທີ່ສະໜັບສະໜູນຂະບວນການເຈລະຈາດັ່ງກ່າວ.
ທ່ານສະເຕຟານ ດູຈາຣິກ ໂຄສົກຂອງທ່ານກູເຕີເຣັສ ກ່າວວ່າ: ເລຂາທິການໃຫຍ່ອົງການສະຫະປະຊາຊາດຮູ້ສຶກມີກຳລັງໃຈຕໍ່ການເຈລະຈາລະຫວ່າງ ສປປ ເກົາຫຼີ ແລະ ສ.ເກົາຫຼີ ໄດ້ຮັບຄວາມຄືບໜ້າຢ່າງຕັ້ງໜ້າ ໂດຍສະເພາະຢ່າງຍິ່ງ ຄື ສອງຝ່າຍເຫັນດີຈັດການພົບປະລະຫວ່າງປະມຸກລັດສອງຝ່າຍ, ໃຫ້ສະຖານະການທາງການທະຫານທີ່ເຄັ່ງຕຶງຢູ່ນັ້ນຜ່ອນຄາຍລົງອີກ ແລະ ເຫັນດີປຶກສາຫາລືກັບບັນດາຝ່າຍທີ່ກ່ຽວຂ້ອງຕໍ່ກັບບັນຫາປອດນິວເຄລຍຂອງແຫຼມເກົາຫຼີ.
ຖະແຫຼງການຊີ້ວ່າ: ບັນດາຝ່າຍທີ່ກ່ຽວຂ້ອງຄວນຮັກສາທ່າອ່ຽງດັ່ງກ່າວ ແລະ ກຳແໜ້ນທຸກໂອກາດ ເພື່ອສະແຫວງຫາເສັ້ນທາງທີ່ກ້າວໄປສູ່ສັນຕິພາບ. ຂະນະດຽວກັນ, ທ່ານກູເຕີເຣັສ ກໍໄດ້ກ່າວຢ້ຳຕໍ່ຄຳໝັ້ນສັນຍາຂອງອົງການສະຫະປະຊາຊາດທີ່ສະໜັບສະໜູນຂະບວນການເຈລະຈາດັ່ງກ່າວ.
