ຕອນບ່າຍວັນທີ 4 ມີນານີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ໄດ້ໂອ້ລົມກັບສະມາຊິກສະພາປຶກສາການເມືອງປະຊາຊົນແຫ່ງຊາດຈາກອົງການສຳພັນປະຊາທິປະໄຕຈີນ, ພັກຈື້ກົ່ງຈີນ ແລະ ບຸກຄົນທີ່ບໍ່ສັງກັດພັກຝ່າຍໃດ, ບຸກຄົນໃນວົງການສະຫະພັນຊາວຕ່າງປະເທດເຊື້ອສາຍຈີນແລະຈີນຕ່າງດ້າວ ທີ່ເຂົ້າຮ່ວມກອງປະຊຸມຄັ້ງທຳອິດຂອງສະພາປຶກສາການເມືອງປະຊາຊົນແຫ່ງຊາດຊຸດທີ 13 ໂດຍກ່າວວ່າ: ລະບອບຫຼາຍພັກຮ່ວມມືກັນ ແລະ ປຶກສາການເມືອງ ທີ່ນຳພາໂດຍພັກກອມມູນິດຈີນ ໃນຖານະເປັນລະບອບພື້ນຖານການເມືອງຂອງຈີນນັ້ນ ແມ່ນການປະດິດສ້າງໃໝ່ທີ່ຍິ່ງໃຫຍ່ດ້ານການເມືອງຂອງພັກກອມມູນິດຈີນ, ປະຊາຊົນຈີນ, ບັນດາພັກຝ່າຍປະຊາທິປະໄຕ ແລະ ບຸກຄົນທີ່ບໍ່ສັງກັດພັກຝ່າຍໃດ, ແມ່ນລະບອບພັກການເມືອງແບບໃໝ່ທີ່ກຳເນີດເກີດຂຶ້ນຢູ່ຈີນ. ຄຳເຫັນດັ່ງກ່າວຂອງທ່ານເລຂາທິການໃຫຍ່ສີຈິ້ນຜິງ ໄດ້ຮັບການຕອບຮັບຢ່າງເປັນເອກະພາບກັນຈາກບັນດາສະມາຊິກສະພາປຶກສາການເມືອງປະຊາຊົນແຫ່ງຊາດ.
ທ່ານສີຈິ້ນຜິງ ຊີ້ວ່າ: ລະບອບຫຼາຍພັກຮ່ວມມືກັນ ແລະ ປຶກສາການເມືອງ ທີ່ນຳພາໂດຍພັກກອມມູນິດຈີນ ແມ່ນລະບອບພັກການເມືອງແບບໃໝ່ທີ່ກຳເນີດເກີດຂຶ້ນຈາກສະພາບຄວາມເປັນຈິງຂອງຈີນ. ການເປັນລະບອບພັກການເມືອງແບບໃໝ່ ກໍຍ້ອນວ່າມັນເປັນສິ່ງກຳເນີດຈາກການປະສົມປະສານກັນລະຫວ່າງທິດສະດີພັກການເມືອງລັດທິມາກແລະສະພາບຄວາມເປັນຈິງຂອງຈີນ, ໄດ້ສ້າງຄວາມສາມັກຄີທີ່ແໜ້ນແຟ້ນລະຫວ່າງບັນດາພັກການເມືອງແລະບຸກຄົນທີ່ບໍ່ສັງກັດພັກຝ່າຍໃດ ແລະ ສູ້ຊົນເພື່ອເປົ້າໝາຍຮ່ວມກັນ, ມັນບໍ່ພຽງແຕ່ສອດຄ່ອງກັບສະພາບຄວາມເປັນຈິງຂອງຈີນໃນຍຸກປັດຈຸບັນເທົ່ານັ້ນ ແຕ່ຍັງສອດຄ່ອງກັບວັດທະນະທຳດັ້ງເດີມທີ່ດີເລີດຂອງຊົນຊາດຈີນທີ່ລິເລີ່ມການເປັນປະເທດຂອງປະຊາຊົນ, ກວມລວມ ແລະ ສະແຫວງຫາສິ່ງທີ່ຄືກັນ, ສະຫງວນສິ່ງທີ່ຕ່າງກັນມາໂດຍຕະຫຼອດອີກດ້ວຍ ແລະເປັນການປະກອບສ່ວນອັນຍິ່ງໃຫຍ່ຕໍ່ອາລະຍະທຳທາງດ້ານການເມືອງຂອງມະນຸດ.
ທ່ານສິງຢົງໝິງ ສະມາຊິກສະພາປຶກສາການເມືອງປະຊາຊົນແຫ່ງຊາດ, ອະທິການບໍດີມະຫາວິທະຍາໄລອຸດສາຫະກຳມົງໂກໃນ ແມ່ນບຸກຄົນທີ່ບໍ່ສັງກັດພັກຝ່າຍໃດ ທ່ານເຫັນວ່າ: ລະບອບຫຼາຍພັກຮ່ວມມືກັນ ແລະ ປຶກສາການເມືອງ ທີ່ນຳພາໂດຍພັກກອມມູນິດຈີນ ແມ່ນພື້ນຖານຂອງລະບອບພັກການເມືອງຂອງຈີນ ການທີ່ຈີນສາມາດດຳລົງຄົງຕົວແລະພັດທະນາມາຮອດສູ່ມື້ນີ້ ກໍໄດ້ພິສູດແລ້ວວ່າ ລະບອບດັ່ງກ່າວໄດ້ເສີມຂະຫຍາຍບົດບາດສຳຄັນຢ່າງມະຫາສານ.
