ສູນຂ່າວກອງປະຊຸມຄັ້ງທຳອິດຂອງສະພາປະຊາຊົນແຫ່ງຊາດຈີນຊຸດທີ 13 ໄດ້ຈັດການຖະແຫຼງຂ່າວຢູ່ສູນມີເດຍໃນເວລາ10 ໂມງຂອງວັນທີ 8 ມີນານີ້ໂດຍທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວຈີນແລະຕ່າງປະເທດກ່ຽວກັບນະໂຍບາຍການຕ່າງປະເທດແລະການພົວພັນຕໍ່ຕ່າງປະເທດຂອງຈີນ.
ທ່ານຫວາງຢີ້ກ່າວວ່າ: ປີ 2018 ເປັນປີທຳອິດແຫ່ງການຜັນຂະຫຍາຍເນື້ອໃນຈິດໃຈຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນ, ຈາກການຊີ້ນຳຂອງແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່, ວຽກງານການຕ່າງປະເທດຂອງຈີນຈະມີຜົນງານໃໝ່ແລະ ສະພາບໃໝ່. ສຳລັບຈຸດເດັ່ນ ຂອງວຽກງານການຕ່າງປະເທດຂອງຈີນໃນປີນີ້ຕົ້ນຕໍຈະສະແດງໃຫ້ເຫັນຢູ່ໃນ 4 ກິດຈະກຳສຳຄັນທີ່ຈີນເປັນເຈົ້າພາບຈັດຂຶ້ນຄື:
ໜຶ່ງ: ກອງປະຊຸມປະຈຳປີຂອງເວທີປຶກສາຫາລືອາຊີໂປອາວທີ່ຈະຈັດຂຶ້ນຢູ່ແຂວງໄຫຫຼຳໃນເດືອນເມສາຈະເນັ້ນຫົວຂໍ້ "ການປະຕິຮູບແລະໄຂປະຕູສູ່ພາຍນອກ". ສອງ: ກອງປະຊຸມສຸດຍອດອົງການຮ່ວມມືຊຽງໄຮທີ່ຈະຈັດຂຶ້ນຢູ່ເມືອງຊິງຕາວໃນເດືອນມິຖຸນາຈະເນັ້ນການສົ່ງເສີມ "ຈິດໃຈຊຽງໄຮ". ສາມ: ກອງປະຊຸມສຸດຍອດເວທີປຶກສາຫາລືການຮ່ວມມືຈີນ-ອາຟຣິກກາຢູ່ນະຄອນຫຼວງປັກກິ່ງໃນເດືອນກັນຍາ, ບັນດາປະເທດອ້າຍນ້ອງອາຟຣິກກາຈະຖືກອງປະຊຸມສຸດຍອດຄັ້ງນີ້ເປັນໂອກາດເພື່ອເຂົ້າຮ່ວມການສ້າງ "ໜຶ່ງແລວໜຶ່ງເສັ້ນທາງ"ຢ່າງຮອບດ້ານແລະເພີ່ມພະລັງແຮງໃໝ່ເຂົ້າໃນການຊຸກຍູ້ເສີມຂະຫຍາຍສາຍພົວພັນຄູ່ຮ່ວມຍຸດທະສາດຮອບດ້ານຈີນ-ອາຟຣິກກາ. ສີ່: ງານວາງສະແດງນຳເຂົ້າສິນຄ້າສາກົນຈີນຄັ້ງທຳອິດຈະຈັດຂຶ້ນຢູ່ຊຽງໄຮໃນເດືອນທັນວາໂດຍເນັ້ນການເປີດປະຕູຕະຫຼາດ.
