ວັນທີ 7 ມີນານີ້, ທ່ານຮາຈີຊາເດ ຜູ້ບັນຊາການກອງທັບອາກາດກອງກຳລັງປະຕິວັດອິດສະລາມອີຣານກ່າວໃນເວລາກວດກາຖານທັບອາກາດວ່າ: ການພັດທະນາຂີປະນາວຸດຂອງປະເທດຕົນແມ່ນຜົນປະໂຫຍດ ແລະຄວາມປອດໄພແຫ່ງຊາດ, ສະນັ້ນ, ແຜນການນີ້ຈະບໍ່ຢຸດຕິ ແລະຈະບໍ່ເຈລະຈາກັບປະເທດໃດທີ່ກ່ຽວກັບບັນຫາດັ່ງກ່າວຢ່າງເດັດຂາດ.
ທ່ານກ່າວຕື່ມວ່າ: ຈັງຫວະການເຕີບໂຕຂອງການພັດທະນາການປ້ອງກັນຊາດອີຣານເພີ່ມຂຶ້ນຕື່ມອີກ, ປະລິມານການຜະລິດຂີປະນາວຸດເພີ່ມຂຶ້ນ 3 ເທົ່າໃນໄລຍະຜ່ານມາ, ເຈຕະນາຂອງບັນດາປະເທດຕາເວັນຕົກທີ່ຢາກກີດຂວາງການພັດທະນາຄວາມສາມາດໃນການປ້ອງກັນຊາດຂອງປະເທດຕົນກໍບໍ່ມີຄວາມໝາຍຫຍັງ. ທ່ານໄດ້ຕຳໜິອາເມລິກາທີ່ນຳໃຊ້ "ສອງມາດຕະຖານ" ໃນການຄົ້ນຄວ້າ ແລະພັດທະນາອາວຸດ ໂດຍສືບຕໍ່ເພີ່ມງົບປະມານພັດທະນາອາວຸດທີ່ມີອະນຸພາບສູງ, ແຕ່ພັດກົດດັນໃຫ້ອີຣານຍົກເລີກແຜນການຄົ້ນຄວ້າ ແລະພັດທະນາຂີປະນາວຸດ.
 |
