ວັນທີ 7 ມີນານີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນໄດ້ເຂົ້າຮ່ວມການຄົ້ນຄວ້າພິຈາລະນາບົດລາຍງານວຽກງານລັດຖະບານຂອງຄະນະຜູ້ແທນແຂວງກວາງຕຸ້ງສະພາປະຊາຊົນແຫ່ງຊາດຈີນ.
ທ່ານສີຈິ້ນຜິງໄດ້ຮັບຟັງການປະກອບຄຳເຫັນຂອງຜູ້ແທນຫຼາຍທ່ານຢ່າງຈິງຈັງ ແລະ ແລກປ່ຽນຄວາມເຫັນກັບຜູ້ແທນທັງຫຼາຍ ໂດຍກ່າວວ່າ, ສ້າງປະເທດໃຫ້ເຂັ້ມແຂງຕ້ອງມີການປະດິດສ້າງໃໝ່ ແລະ ການປະດິດສ້າງໃໝ່ຕ້ອງອາໄສຊັບພະຍາກອນມະນຸດ. ຖ້າຈີນບໍ່ເດີນຕາມເສັ້ນທາງການພັດທະນາແບບປະດິດສ້າງໃໝ່, ກຳລັງຊຸກດັນເກົ່າບໍ່ສາມາດປ່ຽນມາເປັນກຳລັງຊຸກດັນໃໝ່ໄດ້ ແລະ ຈີນຈະບໍ່ສາມາດເຂັ້ມແຂງຂຶ້ນຢ່າງແທ້ຈິງ.
ໂອກາດນີ້, ທ່ານໄດ້ຮຽກຮ້ອງຫຼາຍກວ່າເກົ່າສຳລັບການພັດທະນາໃໝ່ໃນຍຸກໃໝ່ຂອງແຂວງກວາງຕຸ້ງ ໂດຍກ່າວວ່າ, ແຂວງກວາງຕຸ້ງຕ້ອງມີສາຍຕາກວ້າງກວ່າເກົ່າ, ມີເປົ້າໝາຍສູງກວ່າເກົ່າ ແລະ ມີມາດຕະການແຂງແຮງກວ່າເກົ່າ ເພື່ອຊຸກຍູ້ການພັດທະນາຢ່າງຮອບດ້ານ, ເລັ່ງພັດທະນາເສດຖະກິດແບບເປີດປະຕູໃນລະດັບສູງກວ່າເກົ່າ, ເລັ່ງສ້າງຮູບແບບການຄ້າໃໝ່, ຕັ້ງໜ້າເຂົ້າຮ່ວມການສ້າງ "ໜຶ່ງແລວໜຶ່ງເສັ້ນທາງ", ກຳໂອກາດສ້າງເຂດອ່າວກວາງຕຸ້ງ, ຮົງກົງ ແລະ ມາເກົາ, ຮ່ວມກັບຮົງກົງ ແລະ ມາເກົາເລັ່ງລັດວຽກງານທີ່ກ່ຽວຂ້ອງ ເພື່ອສ້າງເຂດອ່າວທະເລລະດັບໜຶ່ງສາກົນ ແລະ ບັນດາຕົວເມືອງລະດັບໂລກ.
