ສູນຂ່າວກອງປະຊຸມເທື່ອທີ 1 ຂອງສະພາປະຊາຊົນແຫ່ງຊາດຈີນສະໄໝທີ 13 ໄດ້ຈັດກອງປະຊຸມຖະແຫຼງຂ່າວໃນວັນທີ 8 ມີນານີ້, ໃນເວລາຕອບຄຳຖາມຂອງນັກຂ່າວກ່ຽວກັບການພົວພັນລະຫວ່າງ ສ.ເກົາຫຼີ ແລະ ສປປ ເກົາຫຼີ, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນກ່າວວ່າ, ສ.ເກົາຫຼີ ແລະ ສປປ ເກົາຫຼີໄດ້ຫາລືແລກປ່ຽນກັນຫຼາຍເທື່ອໃນໂອກາດງານກິລາໂອລິມປິກລະດູໜາວພຽງຊາງ ເຮັດໃຫ້ການພົວພັນລະຫວ່າງສອງປະເທດດີຂຶ້ນເລື້ອຍໆ. ພວກເຮົາສັງເກດເຫັນແລ້ວວ່າ, ສປປ ເກົາຫຼີບໍ່ໄດ້ດຳເນີນການທົດລອງຂີປະນາວຸດ ແລະ ທົດລອງນິວເຄຼຍໃໝ່ໃນໄລຍະງານກິລາດັ່ງກ່າວ, ອາເມລິກາ ແລະ ສ.ເກົາຫຼີກໍໄດ້ຢຸດຕິການຊ້ອມຮົບຮ່ວມທີ່ແນໃສ່ ສປປ ເກົາຫຼີ. ເລື່ອງຈິງຢືນຢັນວ່າ, ຂໍ້ລິເລີ່ມ "ຢຸດຕິທັງສອງດ້ານ" ທີ່ຈີນສະເໜີມານັ້ນ ເປັນວິທີທີ່ຖືກຕ້ອງ ແລະສ້າງເງື່ອນໄຂພື້ນຖານທີ່ດີທີ່ສຸດໃຫ້ແກ່ເໜືອໃຕ້ປັບປຸງການພົວພັນກັນ.
ປັດຈຸບັນ, ການແກ້ໄຂບັນຫາແຫຼມເກົາຫຼີໄດ້ຢວ່າງບາດກ້າວສຳຄັນໄປສູ່ທິດທາງທີ່ຖືກຕ້ອງ. ສະນັ້ນ, ພວກເຮົາຮຽກຮ້ອງໃຫ້ຝ່າຍຕ່າງໆຄວນດຳເນີນການພົບປະສອງຝ່າຍ ແລະ ຫຼາຍຝ່າຍທີ່ຈຳເປັນ ແລະ ມີຜົນປະໂຫຍດ ໂດຍໄວ, ອອກແຮງສຸດຂີດເພື່ອຊຸກຍູ້ການເຈລະຈາເພື່ອແກ້ໄຂບັນຫານິວເຄຼຍແຫຼມເກົາຫຼີໂດຍສັນຕິ ແລະ ຈີນຈະສືບຕໍ່ພະຍາຍາມເພື່ອເລື່ອງນີ້ຢ່າງເຕັມທີ່.
 |
