ຈີນຫວັງໃຫ້ການຈັດສັນການຄ້າເສລີຕ່າງໆຂອງພາກພື້ນອາຊີປາຊີຟິກສາມາດຊ່ວຍຊູຍູ້ໜູນກັນ
2018-03-08 14:58:15 cri
ກອງປະຊຸມເທື່ອທີ 1 ຂອງສະພາປະຊາຊົນແຫ່ງຊາດຈີນສະໄໝທີ 13 ໄດ້ຈັດກອງປະຊຸມຖະແຫຼງຂ່າວໃນຕອນເຊົ້າວັນທີ 8 ມີນານີ້, ຂະນະທີ່ຕອບຄຳຖາມຂອງນັກຂ່າວ CRI ກ່ຽວກັບມີປະເທດຈຳນວນໜຶ່ງໄດ້ຈັດພິທີລົງນາມໃນ "ສັນຍາການພົວພັນຄູ່ຮ່ວມຂ້າມມະຫາສະໝຸດປາຊີຟິກຢ່າງຮອບດ້ານແລະກ້າວໜ້າ" ຫຼື CPTPP ຢູ່ຈີເລ, ທ່ານຫວາງຢີ້ກ່າວວ່າ, ຈີນບໍ່ໄດ້ເຂົ້າເປັນປະເທດພາຄີ CPTPP, ແຕ່ຈີນເປັນຜູ້ສະໜັບສະໜູນການຄ້າເສລີທີ່ແຂງແຮງມາໂດຍຕະຫຼອດ ແລະ ກໍແມ່ນຄູ່ຮ່ວມສຳຄັນໃນການຮ່ວມມື ແລະ ການເຊື່ອມໂຍງເຂົ້າກັນຂອງພາກພື້ນອາຊີປາຊີຟິກ. ຈີນພວມຕັ້ງໜ້າເຂົ້າຮ່ວມການພົວພັນຄູ່ຮ່ວມເສດຖະກິດຮອບດ້ານພາກພື້ນ ຫຼື RCEP ເຊິ່ງເປັນການຈັດສັນການຄ້າເສລີທີ່ປົກຄຸມປະຊາກອນຫຼາຍທີ່ສຸດ ແລະ ມີສະມາຊິກຫຼາຍທີ່ສຸດໃນໂລກ. ບໍ່ວ່າ RCEP ຫຼື CPTPP, ຂໍພຽງແຕ່ສອດຄ່ອງກັບທິດທາງທີ່ເສດຖະກິດພາກພື້ນອາຊີປາຊີຟິກເຊື່ອມໂຍງເຂົ້າກັນ, ສອດຄ່ອງກັບຫຼັກການໂປ່ງໃສ, ເປີດປະຕູ ແລະ ກວມລວມ ແລະ ມີຜົນດີຕໍ່ການປົກປັກຮັກສາລະບົບການຄ້າເສລີທົ່ວໂລກ ທີ່ຖືເອົາອົງການການຄ້າໂລກ ຫຼື WTO ເປັນແກນກາງ, ຈີນລ້ວນແຕ່ຈະມີທ່າທີທີ່ຕັ້ງໜ້າຕໍ່ການຈັດສັນແບບນີ້.
