ວັນທີ 8 ມີນານີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນເຂົ້າຮ່ວມການຄົ້ນຄວ້າພິຈາລະນາບົດລາຍງານວຽກງານລັດຖະບານຂອງຄະນະຜູ້ແທນແຂວງຊານຕຸ່ງ ໂດຍກ່າວວ່າ, ການປະຕິບັດຍຸດທະສາດພັດທະນາຊົນນະບົດໃຫ້ຈະເລີນຂຶ້ນ ແມ່ນນະໂຍບາຍສຳຄັນຂອງກອງປະຊຸມໃຫຍ່ຄັ້ງທີ 19 ຂອງພັກ, ເປັນໜ້າທີ່ປະຫວັດສາດສຳຄັນທີ່ສູ້ຊົນສ້າງສັງຄົມອີ່ມໜຳສຳລານໃນໄລຍະສຸດທ້າຍໃຫ້ສຳເລັດຜົນຢ່າງຮອບດ້ານ ແລະ ສ້າງປະເທດສັງຄົມນິຍົມທັນສະໄໝຢ່າງຮອບດ້ານ ແລະ ແມ່ນວິທີລວມເພື່ອຊຸກຍູ້ວຽກງານ "ກະສິກຳ, ຊົນນະບົດ ແລະ ຊາວກະສິກອນ" ໃຫ້ດີໃນຍຸກໃໝ່. ຂະແໜງການກະສິກຳເຂັ້ມແຂງຫຼືບໍ່, ຊົນນະບົດງາມຫຼືບໍ່ ແລະ ຊາວກະສິກອນຮັ່ງມີຫຼືບໍ່ ແມ່ນປັດໄຈຕັດສິນຄຸນນະພາບຂອງສັງຄົມອີ່ຫຼຳສຳລານຮອບດ້ານ ແລະ ການສ້າງສາສັງຄົມນິຍົມທັນສະໄໝ. ຕ້ອງຮັບຮູ້ເຖິງຄວາມສຳຄັນ ແລະ ຄວາມຈຳເປັນໃນການປະຕິບັດຍຸດທະສາດພັດທະນາຊົນນະບົດໃຫ້ຈະເລີນຂຶ້ນຢ່າງເລິກເຊິ່ງ ແລະ ປະຕິບັດຍຸດທະສາດດັ່ງກ່າວໃຫ້ດີຢ່າງແທ້ຈິງ.
ໃນເວລາປະກອບຄຳເຫັນ, ທ່ານສີຈິ້ນຜິງໄດ້ຢືນຢັນຜົນງານຂອງແຂວງຊານຕຸ່ງແຕ່ກອງປະຊຸມໃຫຍ່ຄັ້ງທີ 18 ຂອງພັກມານີ້ຢ່າງເຕັມສ່ວນ ແລະ ຫວັງໃຫ້ແຂວງຊານຕຸ່ງສູ້ຊົນກ້າວໜ້າຕໍ່ໆໄປ ເພື່ອຢືນຢູ່ແຖວໜ້າໃນຂະບວນການສ້າງສັງຄົມອີ່ໜຳສຳລານໃຫ້ສຳເລັດຢ່າງຮອບດ້ານ ແລະ ສ້າງສາສັງຄົມນິຍົມທັນສະໄໝ.
