ວັນທີ 8 ມີນານີ້, ທ່ານ ຈູງອຸຍຢົງ ຫົວໜ້າຫ້ອງການປ້ອງກັນຄວາມໝັ້ນຄົງແຫ່ງຊາດທຳນຽບປະທານາທິບໍດີຊົງວາເດສ.ເກົາຫຼີທີ່ພວມຢ້ຽມຢາມອາເມລິກາ ກ່າວວ່າ, ທ່ານ ກິມເຈິງອຸນ ຜູ້ນຳສູງສຸດ ສປປ ເກົາຫຼີ ໄດ້ຝາກໃຫ້ສ.ເກົາຫຼີ ແຈ້ງເຈຕະນາຂອງຕົນທີ່ຫວັງຢາກພົບປະກັບທ່ານ ໂດນັນ ທຣຳ ປະທານາທິບໍດີອາເມລິກາໂດຍໄວໃຫ້ຝ່າຍອາເມລິກາຊາບ ແລະທ່ານ ທຣຳ ກໍໄດ້ເຫັນດີທີ່ຈະພົບປະກັບທ່ານ ກິມເຈິງອຸນ ກ່ອນເດືອນພຶດສະພາປີນີ້.
ທ່ານ ຈູງອຸຍຢົງ ໄດ້ແຈ້ງໃຫ້ສື່ມວນຊົນຊາບ ຫຼັງຈາກແຈ້ງສະພາບການທີ່ຄະນະທູດພິເສດສ.ເກົາຫຼີຢ້ຽມຢາມສປປເກົາຫຼີກ່ອນໜ້ານີ້ບໍ່ດົນໃຫ້ທ່ານທຣຳຊາບຢູ່ທຳນຽບຂາວ. ທ່ານກ່າວຕື່ມວ່າ, ຕົນເອງໄດ້ແຈ້ງໃຫ້ທ່ານທຣຳຊາບວ່າ, ໃນເວລາຕ້ອນຮັບການເຂົ້າພົບຂອງຄະນະທູດພິເສດສ.ເກົາຫຼີ, ທ່ານ ກິມເຈິງອຸນໄດ້ກ່າວຄຳໝັ້ນສັນຍາຂອງສປປເກົາຫຼີກ່ຽວກັບການປອດອາວຸດນິວເຄລຍຢູ່ແຫຼມເກົາຫຼີແລະຫຼີກລ້ຽງການທົດລອງອາວຸດນິວເຄລຍແລະການທົດລອງຍິງຂີປະນາວຸດຕື່ມອີກ.
ນັບແຕ່ວັນທີ 5-6 ມີນານີ້, ທ່ານ ມູນແຈອິນ ປະທານາທິບໍດີສ.ເກົາຫຼີ ໄດ້ແຕ່ງຕັ້ງທ່ານ ຈູງອຸຍຢົງ ນຳພາຄະນະທູດພິເສດໄປຢ້ຽມຢາມສປປເກົາຫຼີ ເພື່ອຕອບຮັບທີ່ທ່ານ ກິມເຈິງອຸນ ທີ່ໄດ້ສົ່ງທູດພິເສດໄປຢ້ຽມຢາມສ.ເກົາຫຼີໃນໂອກາດງານກິລາໂອລິມປິກລະດູໜາວພຽງຊາງ.
 |
