ຫວ່າງບໍ່ດົນມານີ້, ທ່ານໄພສານ ພືດມົງຄົນ ທີ່ປຶກສາຮອງນາຍົກລັດຖະມົນຕີໄທ,ຮອງປະທານສະມາຄົມວັດທະນະທຳເສດຖະກິດໄທ-ຈີນຢືນຢັນວ່າ ການທີ່ຈີນປັບປຸງລັດຖະທຳມະນູນຈະມີຄວາມໝາຍສຳຄັນຫຼາຍຕໍ່ການພັດທະນາຂອງສັງຄົມຈີນ.
ໃນຖານະເປັນຊ່ຽວຊານທີ່ມີຊື່ສຽງຂອງໄທໃນການຄົ້ນຄວ້າຈີນແລະປະຫວັດສາດພັກກອມມູນິດຈີນ, ທ່ານໄພສານ ພືດມົງຄົນ ໄດ້ລົງເລິກຄົ້ນຄວ້າໂຄງປະກອບການເມືອງຂອງຈີນ. ທ່ານເຫັນວ່າ: ກອງປະຊຸມສອງສະພາຂອງຈີນໃນປີນີ້ມີຄວາມສຳຄັນຫຼາຍ ເຊິ່ງຄວາມໝາຍກໍຢູ່ໃນບ່ອນວ່າ ຜ່ານຂັ້ນຕອນກົດໝາຍເຮັດໃຫ້ຈຸດຢືນຂອງພັກກອມມູນິດຈີນຫັນເປັນຄວາມມຸ້ງຫວັງຂອງຊາດ, ເຮັດໃຫ້ຜົນສຳເລັດທຸກຢ່າງໃນພຶດຕິກຳຂອງພັກກອມມູນິດຈີນຍົກລະດັບຂຶ້ນເປັນມາດຕາຂອງລັດຖະທຳມະນູນ.
ທ່ານໄພສານ ພືດມົງຄົນເອົາໃຈໃສ່ເປັນຢ່າງຍິ່ງຕໍ່ຮ່າງລັດຖະທຳມະນູນສະບັບປັບປຸງທີ່ໄດ້ເພີ່ມເນື້ອໃນກ່ຽວກັບ ການຊຸກຍູ້ການສ້າງປະຊາຄົມຮ່ວມຊາຕາກຳມວນມະນຸດ ໂດຍເຫັນວ່າ ການປັບປຸງດັ່ງກ່າວໄດ້ສ່ອງແສງໃຫ້ເຫັນເຖິງຈິດໃຈກ້າວໜ້າໄປພ້ອມຍຸກສະໄໝ. ທ່ານສີຈິ້ນຜິງນຳພາຈີນກ້າວຂຶ້ນສູ່ແຖວໜ້າຂອງໂລກແລະມຸ້ງໜ້າໄປສູ່ຍຸກໃໝ່. ຂໍ້ລິເລີ່ມ "ໜຶ່ງແລວໜຶ່ງເສັ້ນທາງ"ທີ່ສະເໜີໂດຍທ່ານສີຈິ້ນຜິງໄດ້ຜູກພັນປະຊາຊົນທະວີບຕ່າງໆໃນໂລກ. ນອກນີ້, ຈີນຍັງແມ່ນປະເທດສະມາຊິກແກນກາງຂອງອົງການຮ່ວມມືຊຽງໄຮ,ທະນາຄານລົງທຶນພື້ນຖານໂຄງລ່າງອາຊີແລະອົງການອື່ນໆ. ຈີນພະຍາຍາມປົກປັກຮັກສາສັນຕິພາບຂອງໂລກ ແລະຮ່ວມທຸກຮ່ວມສຸກກັບບັນດາປະເທດໃນໂລກ. ດ້ວຍເຫດນີ້, ລັດຖະທຳມະນູນກໍຄວນກ້າວໜ້າໄປພ້ອມຍຸກສະໄໝໂດຍມີການປັບປຸງໄປພ້ອມ.
 |
