ວັນທີ 9 ມີນານີ້, ທ່ານນາງຫຼີບິ່ນ ປະທານຄະນະກຳມະການສາທາລະນະສຸກແລະວາງແຜນຄອບຄົວແຫ່ງຊາດຈີນໃຫ້ຮູ້ວ່າ, ການຊ່ອຍຄົນທຸກຍາກທາງສາທາລະນະສຸກຂອງຈີນໄດ້ຜົນສຳເລັດອັນຕັ້ງໜ້າ, ມາຮອດທ້າຍປີ 2017 ຜ່ານມາ, ໄດ້ປິ່ນປົວຄົນທຸກຍາກທີ່ເປັນພະຍາດ 4 ລ້ານ 2 ແສນກວ່າຄົນແລະໃນປີ2017, ມີ 1ລ້ານ 8 ແສນ 5 ໝື່ນຄອບຄົວທີ່ທຸກຍາກຍ້ອນພະຍາດໄດ້ຫຼຸດຜ່ອນຄວາມທຸກຍາກ.
ທ່ານນາງຫຼີບິ່ນກ່າວວ່າ, ໂດຍຜ່ານມາດຕະການຕ່າງໆ, ປີ 2017 ຜ່ານມາ, ອັດຕາສ່ວນຄ່າປິ່ນປົວທີ່ປະຊາກອນຜູ້ທຸກຍາກຕ້ອງໃຊ້ຈ່າຍໂດຍຕົນເອງນັ້ນໄດ້ຫຼຸດລົງຮອດປະມານ 20%.
ທ່ານນາງຫຼີບິ່ນກ່າວຕື່ມວ່າ, ການຊ່ອຍຄົນທຸກຍາກທາງສາທາລະນະສຸກແມ່ນໜ້າທີ່ໄລຍະຍາວ, ໃນບາດກ້າວຕໍ່ໄປຈະປັບປຸງເຄືອຂ່າຍຮັບປະກັນການປິ່ນປົວໃຫ້ດີຂຶ້ນຕື່ມອີກ, ສ້າງກົນໄກໄລຍະຍາວທີ່ປ້ອງກັນບໍ່ໃຫ້ກັບຄືນຄວາມທຸກຍາກຍ້ອນພະຍາດ, ປະຕິບັດນະໂຍບາຍທີ່ໃຫ້ບຸລິມະສຸດໃນາກນສະໜັບສະໜູນປະຊາກອນທຸກຍາກ. ປີນີ້, ມາດຕະຖານອຸດໜູນທາງການເງິນຂອງການປະກັນໄພການປິ່ນປົວຂອງຊາວເມືອງຈີນຈະເພີ່ມຂຶ້ນ 40 ຢວນຕໍ່ຄົນ, ໃນນັ້ນເຄິ່ງໜຶ່ງຈະໃຊ້ໃນການປະກັນໄພພະຍາດຮ້າຍແຮງ. ການເງິນສູນກາງຈີນຈະໃຊ້ງົບປະມານ 22 ຕື້ 100 ລ້ານກວ່າຢວນໃຊ້ໃນການຊ່ອຍເຫຼືອການປິ່ນປົວໂດຍສະເພາະ.
