ວັນທີ 9 ມີນານີ້, ທ່ານສີຈິ້ນຜິງ ປະທານປະເທດຈີນໄດ້ຮັບໂທລະສັບຂອງທ່ານໂດນານ ທຣຳ ປະທານາທິບໍດີອາເທລິກາ ເພື່ອແລກປ່ຽນຄຳຄິດເຫັນກ່ຽວກັບສະພາບການແຫຼມເກົາຫຼີ ແລະສາຍພົວພັນສອງປະເທດ.
ທ່ານທຣຳກ່າວວ່າ: ໃນມໍ່ໆມານີ້, ບັນຫານິວເຄຼຍແຫຼມເກົາຫຼີໄດ້ຮັບຄວາມຄືບໜ້າທີ່ຕັ້ງໜ້າ, ສປປ ເກົາຫຼີໄດ້ມີທ່າທີຢ່າງຕັ້ງໜ້າ, ການທີ່ປະເທດຕົນ ແລະ ສປປ ເກົາຫຼີສາມາດຈັດການພົບປະລະດັບສູງນັ້ນຈະມີຜົນດີຕໍ່ຝ່າຍຕ່າງໆ, ຫວັງວ່າບັນຫານິວເຄຼຍແຫຼມເກົາຫຼີສາມາດແກ້ໄຂໂດຍສັນຕິໃນທີ່ສຸດ. ປະເທດຕົນຂອບໃຈຫຼາຍ ແລະເອົາໃຈໃສ່ສູງຕໍ່ບົດບາດທີ່ສຳຄັນຂອງຈີນໃນບັນຫາແຫຼມເກົາຫຼີ ແລະຍິນດີສືບຕໍ່ແລກປ່ຽນ ແລະປະສານງານກັບຈີນຢ່າງແໜ້ນແຟ້ນ.
ທ່ານສີຈິ້ນຜິງກ່າວວ່າ: ປະເທດຕົນເດັດດ່ຽວສຸມໃສ່ການປອດນິວເຄຼຍຂອງແຫຼມເກົາຫຼີ, ຮັກສາສັນຕິພາບສະຖຽນລະພາບຂອງແຫຼມເກົາຫຼີ ແລະຍຶດໝັ້ນແກ້ໄຂບັນຫາດັ່ງກ່າວຜ່ານການເຈລະຈາ. ຫວັງວ່າ ອາເມລິກາ ແລະ ສປປ ເກົາຫຼີສາມາດເປີດການເຈລະຈາໂດຍໄວ ແລະພະຍາຍາມໃຫ້ໄດ້ຮັບໝາກຜົນຢ່າງຕັ້ງໜ້າ.
ປະມຸກລັດສອງທ່ານຍັງໄດ້ແລກປ່ຽນຄຳຄິດເຫັນກ່ຽວກັບສາຍພົວພັນສອງປະເທດ. ທ່ານສີຈິ້ນຜິງກ່າວວ່າ: ຫວັງວ່າ ສອງຝ່າຍຈະພະຍາຍາມຮ່ວມກັນ, ບົນພື້ນຖານເຄົາລົບນັບຖືເຊິ່ງກັນ ແລະກັນ, ຕ່າງຝ່າຍຕ່າງມີຜົນປະໂຫຍດ, ສຸມໃສ່ການຮ່ວມມື, ຄວບຄຸມຄວາມເຫັນທີ່ຕ່າງກັນ ເພື່ອຊຸກຍູ້ການຮ່ວມມືເສດຖະກິດຂອງສອງປະເທດໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ ແລະຊຸກຍູ້ສາຍພົວພັນສອງປະເທດໃຫ້ໄດ້ຮັບຄວາມຄືບໜ້າຫຼາຍກວ່າເກົ່າໃນປີໃໝ່ນີ້.
ທ່ານທຣຳໄດ້ຊົມເຊີຍຕໍ່ປະເທດຈີນທີ່ໄດ້ຈັດກອງປະຊຸມສອງສະພາປີ 2018 ຢ່າງສຳເລັດຜົນ ແລະກ່າວວ່າ: ການທີ່ປະມຸກລັດສອງປະເທດຮັກສາການພົວພັນຢ່າງແໜ້ນແຟ້ນນັ້ນມີຄວາມສຳຄັນຫຼາຍຕໍ່ການພັດທະນາສາຍພົວພັນສອງຊາດ. ປະເທດຕົນເອົາໃຈໃສ່ສູງຕໍ່ສາຍພົນພັນອາເມລິກາ-ຈີນ ແລະການຮ່ວມມືລະຫວ່າງສອງຝ່າຍ, ຍິນດີພະຍາຍາມຮ່ວມກັບຈີນ ເພື່ອຊຸກຍູ້ສາຍພົວພັນສອງຊາດໃຫ້ພັດທະນາກ້າວໄປໜ້າ.
 |
