ວັນທີ 10 ມີນານີ້ ທ່ານມູຊາ ຟາຄີ ມາຮະມັດ ປະທານຄະນະກຳມະການສະຫະພາບອາຟຣີກາກ່າວວ່າ, ສະຫະພັນອາຟຣີກາກຳລັງພະຍາຍາມຊຸກຍູ້ວຽກງານສ້າງຕັ້ງເຂດການຄ້າເສລີແຜ່ນດິນໃຫຍ່ອາຟຣີກາ.
ຫຼັງຈາກເດີນທາງໄປຮອດອັນເຊລີໃນມື້ດຽວກັນແລ້ວ ທ່ານຟາຄີໄດ້ກ່າວຕໍ່ສື່ມວນຊົນຢູ່ສະໜາມບິນວ່າ, ສະຫະພາບອາຟຣີກາກຳລັງຢູ່ໃນກາລະໂອກາດທີ່ສຳຄັນ, ເຊິ່ງຈະປະກາດມາດຕະການສຳຄັນຈຳນວນໜຶ່ງ, ລວມທັງການສ້າງຕັ້ງເຂດການຄ້າເສລີແຜ່ນດິນໃຫຍ່ອາຟຣີກາ.
ທ່ານຟາຄີກ່າວວ່າ, ໃນກອງປະຊຸມສຸດຍອດຂອງສະຫະພາບອາຟຣີກາທີ່ຈັດຂຶ້ນຢູ່ແອເຊໂອໃນເດືອນມັງກອນປີນີ້, ບັນດາປະເທດອາຟຣີກາເຫັນດີນຳຂໍ້ສະເໜີກ່ຽກກັບການສ້າງຕັ້ງເຂດການຄ້າເສລີແຜ່ນດິນໃຫຍ່ອາຟຣີກາໂດຍທົ່ວໄປ, ເຊິ່ງກໍ່ແມ່ນເນື້ອໃນຕົ້ນຕໍທີ່ຈະປຶກສາຫາລືກັນໃນກອງປະຊຸມສຸດຍອດສະຫະພາບອາຟຣີກາຊຸດໜ້າ. ທ່ານເຜີຍໃຫ້ຮູ້ວ່າ, ຖ້າມີເງື່ອນໄຂພຽງພໍ, ໃນກອງປະຊຸມຜູ້ນຳສຸດຍອດສະຫະພັນອາຟຣີກາທີ່ຈະຈັດຂຶ້ນຢູ່ນະຄອນຫຼວງກີຈາລີຂອງລູວັງດາ, ປະເທດອາຟຣີກາທັງໝົດຈະເຊັນສັນຍານຳກັນເພື່ອສ້າງຕັ້ງເຂດການຄ້າເສລີແຜ່ນດິນໃຫຍ່ອາຟຣີກາ.
ໃນເດືອນມິຖຸນາປີ 2015 ຜ່ານມາ, ປະເທດສະມາຊິກສະຫະພາບອາຟຣີກາລິເລີ່ມມີການເຈລະຈາກັນກ່ຽວກັບການສ້າງເຂດການຄ້າເສລີທະວີບອາຟຣີກາ. ສະຫະພາບອາຟຣີກາຫວັງໃຫ້ຜ່ານຈາກການສ້າງຕັ້ງເຂດການຄ້າເສລີເພື່ອຫຼຸດພາສີໃຫ້ໜ້ອຍລົງ, ຍົກເລີກກຳແພງການຄ້າ, ຊຸກຍູ້ການພັດທະນາທາງການຄ້າແລະການລົງທຶນພາຍໃນພາກພື້ນ, ບັນລຸໃຫ້ຜະລິດຕະພັນ ການບໍລິການ ແລະທຶນຮອນຈໍລະຈອນຢ່າງເສລີພາຍແຜ່ນດິນໃຫຍ່ອາຟຣີກາ, ແລ້ວສາມາດເຕົ້າໂຮມອົງກອນເສດຖະກິດຕ່າງໆໃນອາຟຣີກາເຊື່ອມໂຍງເຂົ້າເປັນຕະຫຼາດໃຫຍ່ອັນໜຶ່ງອັນດຽວກັນ.
 |
